“எங்களை இதுக்குள்ள இழுக்காதீங்க” நீட் தேர்வு மாணவர் போராட்டம் – டெல்லி உயர் நீதிமன்றம் அதிரடி மறுப்பு..!!

நீட் தேர்வு வினாத்தாள் கசிவு விவகாரத்தில் மத்திய கல்வி அமைச்சர் தர்மேந்திர பிரதான் பதவி விலகக் கோரி, டெல்லியில் ‘காக்ரோச் ஜனதா கட்சி’ சார்பாக மாணவர்கள் நடத்திய நாடாளுமன்ற நோக்கிய அமைதிப் பேரணியில் டெல்லி போலீசார் அத்துமீறி வன்முறையைக் கட்டவிழ்த்து விட்டதாகக் கூறி தொடரப்பட்ட அவசர வழக்கை விசாரிக்க டெல்லி உயர் நீதிமன்றம் மறுத்துவிட்டது. இந்த விவகாரத்திற்குள் நீதிமன்றத்தை தேவையின்றி இழுக்க வேண்டாம் என்று தலைமை நீதிபதி டி.கே. உபாத்யாயா தலைமையிலான அமர்வு திட்டவட்டமாகத் தெரிவித்ததுடன், இந்த மனு புதன்கிழமை அன்று சாதாரண விசாரணைப் பட்டியலின் கீழ் விசாரிக்கப்படும் என அறிவித்துள்ளது.

நீட் முறைகேடுகளுக்கு எதிராக 21 நாட்களாகத் தொடர் உண்ணாவிரதப் போராட்டம் இருந்து வந்த சமூக ஆர்வலர் சோனம் வாங்சுக், கடந்த சனிக்கிழமை அன்று போலீசாரால் வலுக்கட்டாயமாக மருத்துவமனைக்குக் கொண்டு செல்லப்பட்டு அவரது போராட்டம் முடக்கப்பட்டது. இதற்கு எதிர்ப்பு தெரிவித்து திங்கள்கிழமை அன்று டெல்லி ஜந்தர் மந்தர் பகுதியில் ஆயிரக்கணக்கான இளம் மாணவர்கள் திரண்டு பிரம்மாண்டப் போராட்டத்தில் ஈடுபட்டனர். அப்போது போராட்டக்காரர்களுக்கும் பாதுகாப்புப் படையினருக்கும் இடையே ஏற்பட்ட கடுமையான மோதலில் கண்ணீர்ப் புகை குண்டுகள் வீசப்பட்டும், தடியடி நடத்தப்பட்டும் வன்முறை வெடித்தது.

இந்தக் கொடூர மோதலில் மூத்த அதிகாரிகள் உட்பட 118 போலீசார் மற்றும் 60-க்கும் மேற்பட்ட மாணவர்கள் என மொத்தம் 178 பேர் படுகாயமடைந்துள்ளதாக டெல்லி காவல்துறை அதிகாரப்பூர்வமாகத் தெரிவித்துள்ளது. இருப்பினும், நியாயமான கோரிக்கைகளுக்காக அமைதியாகப் போராடிய நேர்மையான மாணவர்களை டெல்லி போலீசார் மிகக் கொடூரமாகத் தாக்கியுள்ளது இந்திய ஜனநாயக வரலாற்றிலேயே ஒரு கருப்பு நாள் என்று போராட்டக் குழுவின் செய்தித் தொடர்பாளர் கடும் கண்டனம் தெரிவித்துள்ளார். மேலும், கல்வி அமைச்சர் பதவி விலகும் வரை தங்களது போராட்டம் ஓயாது என்றும் அவர்கள் பிரகடனப்படுத்தியுள்ளனர்.