“அப்பா கொஞ்சம் பார்த்து பேசுங்க” பிரச்சினை ஆகிடப்போகுது… மகன் துரை வைகோ கொடுத்த திடீர் அலர்ட்..? நடந்து என்ன..??

மதிமுக பொதுச்செயலாளர் வைகோவின் சமீபத்திய அரசியல் பேச்சுக்கள் கூட்டணிக்குள் பல்வேறு விவாதங்களை உருவாக்கியுள்ள சூழலில், அவர் பொதுவெளியில் பேசும்போது கூடுதல் கவனத்துடன் இருக்க வேண்டும் என அவரது மகனும் கட்சியின் முதன்மைச் செயலாளருமான துரை வைகோ அறிவுறுத்தியுள்ளதாக அரசியல் வட்டாரங்களில் தகவல்கள் பரவி வருகின்றன.

சமீபத்தில் நடைபெற்ற சட்டமன்றத் தேர்தலுக்குப் பிறகு, திமுக கூட்டணியிலிருந்து விலகிய மதிமுக, தமிழக வெற்றிக் கழகத்தின் ஆதரவு நிலையை நோக்கி நகர்ந்தது. எனினும், உதயசூரியன் சின்னத்தில் போட்டியிட்டு வெற்றி பெற்ற மதிமுகவின் இரண்டு சட்டமன்ற உறுப்பினர்கள் தங்களது பதவியை ராஜினாமா செய்ய மறுப்புத் தெரிவித்தனர்.

இதனிடையே, தவெக அரசுக்கு ஆதரவாக மதிமுக செயல்படும் என்று வைகோ வெளிப்படையாக அறிவித்திருந்தாலும், அதன்பின்னர் அவர் அளித்த சில பேட்டிகள் சர்ச்சையை உருவாக்கின. குறிப்பாக, ‘மதிமுக எம்.எல்.ஏ.க்கள் பதவி விலகினால் அவர்கள் தொகுதிக்கு நேரில் சென்று பிரச்சாரம் செய்வதாக முதல்வர் விஜய் உறுதியளித்தார்’ போன்ற வைகோவின் வெளிப்படையான கருத்துக்கள் அரசியல் களத்தில் பெரும் சலசலப்பை ஏற்படுத்தின.

இத்தகைய கருத்து பரிமாற்றங்கள் கூட்டணியின் சுமுகமான சூழலை பாதிக்கும் என்பதால், வைகோ பொதுவெளியில் கருத்துக்கள் தெரிவிக்கும் போது எச்சரிக்கையுடன் பேச வேண்டும் என துரை வைகோ கேட்டுக்கொண்டதாகக் கூறப்படுகிறது. மேலும், புதிய கூட்டணியில் எதிர்பார்க்கப்பட்ட முக்கிய பொறுப்புகள் மற்றும் அதிகாரப் பகிர்வுகளில் ஏற்பட்ட சில மாற்றங்கள் குறித்தும் கட்சிக்குள் ஆலோசனைகள் நடைபெற்று வருவதாகத் தெரிகிறது. இருப்பினும், இது தொடர்பாக மதிமுக அல்லது துரை வைகோ தரப்பில் அதிகாரப்பூர்வ விளக்கம் எதுவும் இதுவரை வெளியாகவில்லை.