“என் புள்ள படிக்கத்தானே போனான்..?” சுரைக்காய் பறிக்கச் சொன்ன ஆசிரியர்.. பள்ளி மாடியில் துடிதுடித்து இறந்த சிறுவன்.. கதறும் பெற்றோர்..!!

உத்தரப் பிரதேசம் பல்லியா மாவட்டத்தில் உள்ள கனைலா நவீன் போக்ரா அரசு தொடக்கப் பள்ளியில், 11,000 வோல்ட் உயர்மின்னழுத்தக் கம்பி தாக்கி அர்ஷத் அகமது என்ற 4-ஆம் வகுப்பு மாணவன் பரிதாபமாக உயிரிழந்த நெஞ்சை உலுக்கும் சம்பவம் பெரும் அதிர்வலைகளை ஏற்படுத்தியுள்ளது. மதிய உணவிற்காகப் பள்ளிக் கட்டிடத்தின் மொட்டை மாடியில் படர்ந்திருந்த செடியிலிருந்து சுரைக்காய் பறித்து வருமாறு ஆசிரியர் கூறியதை அடுத்து, அந்த சிறுவன் மாடிக்குச் சென்றுள்ளான். அப்போது அங்கு மிகத் தாழ்வாகச் சென்றுகொண்டிருந்த மின்சாரக் கம்பியில் எதிர்பாராதவிதமாகத் தொட்டதால், அந்த இடத்திலேயே மின்சாரம் பாய்ந்து உடல் கருகி பலியானான். புத்தகங்களைச் சுமக்க வேண்டிய பிஞ்சு கைகளில் மரணத்தை ஏந்திய இந்தச் சிறுவன், அவனது பெற்றோருக்கு இருக்கும் ஆறு குழந்தைகளில் மிக இளையவன் என்பது இந்தத் துயரத்தின் ஆழத்தை அதிகமாக்குகிறது.

இந்தக் கொடூரச் சம்பவம் ஒட்டுமொத்தக் கல்வி மற்றும் நிர்வாக அமைப்பின் அலட்சியப் போக்கையே வெளிச்சம் போட்டுக் காட்டுகிறது. இது ஒரு விபத்து அல்ல, முறையான பாதுகாப்பு விதிகளைப் பின்பற்றாத அதிகாரிகளின் கூட்டுப் படுகொலை என்றே பொதுமக்கள் கொந்தளித்து வருகின்றனர். ஒரு பள்ளிக்கூடத்தின் மேல் இவ்வளவு ஆபத்தான மின் கம்பிகள் செல்வதை மின்சாரத் துறையும் பள்ளி நிர்வாகமும் எவ்வாறு அனுமதித்தன என்ற நியாயமான கேள்விகள் எழுகின்றன. இச்சம்பவம் தொடர்பாகப் பள்ளித் தலைமை ஆசிரியர், உதவி ஆசிரியர் உள்ளிட்டோர் சஸ்பெண்ட் செய்யப்பட்டு, கைது செய்யப்பட்டுள்ளனர். பாதிக்கப்பட்ட அர்ஷத்தின் குடும்பத்தினர் வெறும் இழப்பீட்டைத் தாண்டி, தங்களின் குழந்தையை இழந்ததற்கு முழுமையான நீதியும், இதற்குக் காரணமானவர்கள் மீது கடுமையான சட்டப்பூர்வ நடவடிக்கையுமே கோரி நிற்கின்றனர்.