“ராகு-கேது, சனி கிரக தோஷமா..?” முதலமைச்சர் விஜய்யின் லண்டன் பயணத்தின் பின்னணியில் இருக்கும் ‘ஜோதிட’ ரகசியம்.. கிளம்பிய புதிய சர்ச்சை..!!

தொழில் முதலீடுகளை ஈர்ப்பதற்காகவே தமிழக முதலமைச்சர் ஜோசப் விஜய் லண்டன் பயணம் மேற்கொண்டுள்ளதாகத் தமிழக வெற்றிக் கழக அரசு விளக்கமளித்துள்ள போதிலும், இது ஒரு ஜோதிட ஆலோசனையின் படி திட்டமிடப்பட்ட பயணம் என்ற புதிய வதந்தி அரசியல் அரங்கில் பெரும் பரபரப்பை ஏற்படுத்தியுள்ளது. குறிப்பாக, தவெக-வின் தேர்தல் வெற்றியை முன்கூட்டியே துல்லியமாகக் கணித்த பிரபல ஜோதிடர் ராதா பண்டிட்டின் அறிவுறுத்தலின் பேரிலேயே முதலமைச்சர் லண்டன் சென்றுள்ளதாக ஆங்கில ஊடகங்கள் சில தகவல்களை வெளியிட்டுள்ளன. முதலமைச்சரின் ஜாதகத்தில் ராகு-கேது மற்றும் சனியின் கிரக நிலைகளால் ஏற்பட்டுள்ள தோஷங்களை நிவர்த்தி செய்யவும், ஆட்சி அதிகாரத்திற்கு வரும் தடைகளையும் அரசியல் எதிர்ப்புகளையும் முறியடிக்கவும் இத்தகைய மேலைநாட்டுப் பயணம் உதவும் என ஜோதிட ரீதியாகக் கூறப்பட்டதே இந்த ரகசியப் பயணத்திற்குக் காரணம் என அரசியல் வட்டாரங்களில் பரவலாகப் பேசப்படுகிறது.

இருப்பினும், இந்த வதந்திகளைத் தமிழக வெற்றிக் கழக நிர்வாகிகளும் அரசுத் தரப்பும் முற்றிலும் மறுத்துள்ளனர். லண்டன் பயணத்தின் போது சுமார் ரூ.12,300 கோடிக்கும் அதிகமான முக்கியத் தொழில் முதலீட்டு ஒப்பந்தங்கள் கையெழுத்தாகியுள்ளதாகவும், செயற்கை நுண்ணறிவு, தகவல் தொழில்நுட்பம் மற்றும் வாகன உதிரிபாகத் துறைகளில் பல பன்னாட்டு நிறுவனங்களுடன் பேச்சுவார்த்தைகள் நடத்தப்பட்டு உள்ளதாகவும் சுட்டிக்காட்டப்பட்டுள்ளது. ஏற்கனவே லண்டனில் சில்வர்ஸ்டோன் கார் பந்தயப் பாதையில் நடிகர் அஜித்தைச் சந்தித்தது மற்றும் ரசிகர் சந்திப்பு ரத்து போன்ற விவகாரங்களால் எதிர்க்கட்சிகள் விமர்சித்து வரும் சூழலில், ஜோதிடரின் அறிவுறுத்தலின் பேரிலேயே பயணம் அமைந்தது என்ற இந்த புதிய வதந்தி இணையத்தில் பேசுபொருளாகியுள்ளது. முதலமைச்சரின் லண்டன் பயணம் அரசியல் ரீதியாகவும் ஆன்மீக ரீதியாகவும் இருவேறு கோணங்களில் தொடர்ந்து விவாதிக்கப்பட்டு வருகிறது.