“அப்பா உன் கூடவே இருப்பேன்…! அம்மாவையும் தங்கச்சியையும் நல்லாப் பார்த்துக்கோ…” உலகை விட்டுப் பிரியும் முன் சிறுவனுக்கு தந்தை தந்த கடைசிப் பாடம்..!!”

சமூக வலைத்தளங்களில் பல நேரங்களில் நம் மனதை உலுக்கும் வகையிலான வீடியோக்கள் வெளியாவது உண்டு. அந்த வகையில், புற்றுநோயின் இறுதிக்கட்டத்தில் இருக்கும் ஒரு தந்தை, உலகை விட்டுப் பிரிவதற்கு முன்பாகத் தனது சிறு வயது மகனுக்குக் கூறிய உணர்ச்சிப்பூர்வமான இறுதியும் அத்தியாவசியமானதுமான அறிவுரைகள் அடங்கிய வீடியோ ஒன்று தற்போது இணையத்தில் வைரலாகி அனைவரையும் கலங்கச் செய்து வருகிறது.

வீடியோவில், உடல்நிலை மிகவும் நலிவடைந்து தனது இறுதி மூச்சை எண்ணிக்கொண்டிருக்கும் தந்தை, தனது மகனை அருகில் அழைத்து வாழ்க்கையின் மிக முக்கியமான பாடத்தைக் கற்றுக்கொடுக்கிறார். தான் மறைந்த பிறகு, தாயின் பேச்சைக் கேட்டு நடக்க வேண்டும் என்றும், அவருக்கு எந்தத் தொந்தரவும் தரக் கூடாது என்றும் அன்போடு அறிவுறுத்துகிறார். மேலும், தனது இரண்டு தங்கைகளுக்கும் பாதுகாப்பாகவும் அரணாகவும் இருந்து அவர்களைப் பார்த்துக்கொள்ள வேண்டும் என்ற பெரிய பொறுப்பையும் அந்தச் சிறுவனிடம் ஒப்படைக்கிறார்.

https://www.instagram.com/reel/DbXSUYBpsH0/?utm_source=ig_web_button_share_sheet

மகன் அழுவதைப் பார்த்த தந்தை, தம்மைக் கட்டுப்படுத்திக்கொண்டு, “நீதான் நல்ல சுட்டிப் பையனாச்சே, அப்புறம் ஏன் அழுகிறாய்?” என்று ஆறுதல் கூறுகிறார். மேலும், “நான் மிகத் தொலைவிற்குச் சென்றுவிட்டாலும், அப்பா எங்கே போனார் என்று கவலைப்படாதே; நீ எப்போதெல்லாம் என்னை நினைக்கிறாயோ, அப்போதெல்லாம் நான் உன்னோடுதான் இருப்பேன்” என்று உருக்கமாகக் கூறுகிறார். இன்ஸ்டாகிராமில் பகிரப்பட்ட இந்த வீடியோவைப் பார்த்த இணையவாசிகள் பலரும் கண்ணீர் மல்க அந்தத் தந்தையின் பாசத்தையும் தைரியத்தையும் பாராட்டி, குடும்பத்தினருக்குத் தங்களின் பிரார்த்தனைகளைத் தெரிவித்து வருகின்றனர்.