LATEST NEWS
EPS-ம் நீங்களும் சேர்ந்து ஒரு மோசடி செஞ்சீங்களே.. அந்த வேதனையில் தான் கூட்டணியை விட்டே வெளியேறினேன்.. திமுக மீது வைகோ ஆவேசம்..!!
மதுராந்தகத்தில் தமிழக வெற்றிக் கழக வேட்பாளரை ஆதரித்து நடைபெற்ற தேர்தல் பரப்புரையில் பேசிய மறுமலர்ச்சி திராவிட முன்னேற்றக் கழகத்தின் பொதுச் செயலாளர் வைகோ, திமுக அரசுக்கு எதிராகக் கடுமையான அரசியல் விமர்சனங்களை முன்வைத்துள்ளார். கடந்த காலங்களில் பெரிய அரசியல் மோசடியை நடத்த முயன்றவர்கள், இன்றைக்கு நாகரிகமற்ற மற்றும் தரக்குறைவான முறையில் விமர்சனங்களைச் செய்து கொண்டிருக்கிறார்கள் என்று அவர் சாடியுள்ளார்.
திமுகவின் அதிகார மையம் எடுத்த சில முடிவுகள் தமக்கு மிகுந்த வேதனையை அளித்ததாக அவர் குறிப்பிட்டுள்ளார். அதிமுக ஆட்சிக்காலத்தில் எடப்பாடி பழனிசாமி அவர்களே முதலமைச்சராகத் தொடரட்டும் என்றும், அதன் மூலம் கிடைக்கும் அரசியல் பலன்கள் தொடர்ந்து திமுகவுக்கே போய்ச் சேரும் என்றும் ஒரு மோசடியான திட்டத்தை திமுக வகுத்திருந்ததாக வைகோ பகிரங்கமாகக் குற்றம் சாட்டியுள்ளார்.
திமுகவின் இந்த ரகசிய அரசியல் கணக்குகளையும், மோசடி திட்டங்களையும் அப்போதே முன்கூட்டியே அறிந்து கொண்டதால்தான், மிகுந்த மனவேதனையுடன் தாங்கள் அந்தத் தேர்தல் கூட்டணியில் இருந்து வெளியேற முடிவெடுத்ததாக வைகோ தனது உரையில் விளக்கமளித்துள்ளார்.
மேலும், தற்போதைய அரசியல் சூழலில் திமுகவினரின் விமர்சனப் போக்குகள் மிகவும் தரம் தாழ்ந்து போய்விட்டதாகக் குறிப்பிட்ட அவர், கொள்கை ரீதியான அரசியலை விடுத்து தனிநபர் விமர்சனங்களிலும் நாகரிகமற்ற பேச்சுகளிலும் அவர்கள் ஈடுபட்டு வருவதாக மதுராந்தகம் பொதுக்கூட்டத்தில் தெரிவித்துள்ளார்.
