பணக்கார திமிரா..? போதை வெறியா..? அடுத்தடுத்து பைக்குகளை துவம்சம் செய்த சொகுசு கார்… சிசிடிவி காட்சிகளால் சிக்கிய ஓட்டுநர்..!!

மும்பையின் பரபரப்பான சாலையில் ஹரியானா மாநிலப் பதிவு எண் (HR 98 X 5101) கொண்ட கருப்பு நிற மஹிந்திரா தார் கார் ஒன்று அதிவேகமாகவும் அஜாக்கிரதையாகவும் இயக்கப்பட்டுள்ளது. அந்த கார் தனக்கு முன்னால் இருவர் பயணித்த ஒரு மோட்டார் சைக்கிள் மீது பின்னால் இருந்து பலமாக மோதியுள்ளது. இந்த மோதலின் வேகத்தில் பைக்கில் இருந்த இருவரும் சாலையில் தூக்கி வீசப்பட்டனர். ஆனால், காரை ஓட்டி வந்த நபர் வாகனத்தை நிறுத்தாமலும், காயமடைந்தவர்களுக்கு உதவ முற்படாமலும் அங்கிருந்து காரை வேகமாகச் செலுத்திச் சென்றுள்ளார்.

முதல் விபத்து நடந்து மக்கள் அதை உணர்வதற்குள், சில மீட்டர்கள் தூரத்திலேயே அந்த தார் கார் மற்றொரு இருசக்கர வாகனத்தின் மீதும் மிகக் கொடூரமாக மோதியுள்ளது. இரண்டாவது பைக்கையும் இடித்த பிறகு, விபத்தை ஏற்படுத்திய ஓட்டுநர் காரின் வேகத்தை மேலும் அதிகரித்து சம்பவ இடத்திலிருந்து தப்பியோடிவிட்டார். பொதுமக்களை உலுக்கிய இந்த அடுத்தடுத்த விபத்தின் அதிர்ச்சியூட்டும் முழு வீடியோவும் சமூக வலைதளங்களில் வெளியாகி தீயாய் பரவி வருகிறது. இதைப் பார்த்த நெட்டிசன்கள் காரின் ஓட்டுநர் மீது கடும் ஆத்திரமடைந்துள்ளனர்.

இந்த வீடியோ சமூக வலைதளங்களில் வைரலாகி பொதுமக்களின் கோபம் உச்சக்கட்டத்தை எட்டியதைத் தொடர்ந்து, மும்பை காவல்துறை உடனடியாகக் களத்தில் இறங்கியுள்ளது. இச்சம்பவத்தை உறுதிப்படுத்திய போலீஸார், வைரல் வீடியோவின் அடிப்படையில் ஓட்டுநருக்கு எதிராக வழக்குப் பதிவு செய்து விசாரணையைத் தொடங்கியுள்ளனர். குற்றம் சாட்டப்பட்ட ஓட்டுநரை உடனடியாகக் கைது செய்ய வேண்டும் என்றும், அவரது ஓட்டுநர் உரிமத்தை நிரந்தரமாக ரத்து செய்ய வேண்டும் என்றும் சமூக வலைதளங்களில் கோரிக்கைகள் வலுத்து வரும் நிலையில், தலைமறைவாக உள்ள ஓட்டுநரை போலீஸார் தீவிரமாகத் தேடி வருகின்றனர்.