இதுவும் சரிதானேப்பா..! கொஞ்ச நேரம் கல்யாணத்துக்கு பட்ஜெட் 30 லட்சமா? அதுக்கு பதிலா இத பண்ணலாமே… இணையத்தில் விவாதத்தை கிளப்பிய இளம்பெண்ணின் வைரல் வீடியோ..!!

இந்தியத் திருமணங்கள் தங்களது ஆடம்பரத்திற்கும் பிரம்மாண்டத்திற்கும் பெயர் பெற்றவை என்றாலும், சமூக ஊடகங்களின் வருகைக்குப் பிறகு இந்தச் செலவுகள் மேலும் அதிகரித்துள்ளன. இந்தச் சூழலில், இன்ஸ்டாகிராம் பயனரான பிரணதி என்ற பெண், தனது திருமணத்திற்காக 30 லட்ச ரூபாய் செலவழிப்பது தனது வாழ்க்கையின் “மிக மோசமான முடிவு” என்று கூறி வெளியிட்டுள்ள வீடியோ இணையத்தில் பெரும் விவாதத்தை ஏற்படுத்தியுள்ளது. சமூகம் இந்த ஆடம்பரச் செலவை இயல்பான ஒன்றாக மாற்றிவிட்டதால் மட்டுமே தான் இந்தச் செலவைச் செய்ய வேண்டிய கட்டாயத்திற்குத் தள்ளப்பட்டிருப்பதாக அவர் அதில் ஆதங்கப்பட்டுள்ளார்.

முப்பது லட்ச ரூபாய் என்பது வெறும் திருமணத்திற்கான பட்ஜெட் மட்டுமல்ல, அது ஒரு வீட்டின் முன்பணம் அல்லது ஒரு தொழிலுக்கான முதலீடு அல்லது பெண்களின் நீண்ட கால நிதிப் பாதுகாப்பிற்கான சேமிப்பு என்று பிரணதி வாதிடுகிறார். பிடிக்காத வேலையை விட்டு வெளியேறுவதற்கும், மோசமான உறவிலிருந்து தப்பிப்பதற்கும், வாழ்க்கையில் விருப்பப்பட்டு தற்காலிக ஓய்வு எடுப்பதற்கும் இந்தச் சேமிப்புப் பணம் தான் ஒருவருக்கு சுதந்திரத்தைத் தரும். சில மணி நேரங்கள் மட்டுமே நீடிக்கும் ஒரு நிகழ்விற்காக, 20 வயதுகளில் நாம் சேர்க்கும் பெரும் தொகையைச் செலவழிப்பது புத்திசாலித்தனம் அல்ல என்றும் அவர் குறிப்பிட்டுள்ளார்.

https://www.instagram.com/reel/DbTnOd9Tl-r/?utm_source=ig_web_button_share_sheet

இந்தத் பதிவு வைரலானதைத் தொடர்ந்து சமூக வலைதளங்களில் கலவையான கருத்துக்கள் எழுந்து வருகின்றன. ஒரு தரப்பினர் பிரணதியின் நிதி சார்ந்த விழிப்புணர்வை முழுமையாக ஆதரிக்கும் வேளையில், திருமணத் திட்டமிடுபவர்கள் கூட இதற்கு வரவேற்பு தெரிவித்துள்ளனர். மறுபுறம், திருமணம் என்பது வாழ்நாளில் ஒருமுறை மட்டுமே நடக்கும் நிகழ்வு என்பதால் ஓராண்டு சம்பளத்தை அதில் செலவிடுவதில் தவறில்லை என்றும், நகை மற்றும் தங்கத்தில் முதலீடு செய்யப்படுவதால் இது வீண் செலவு அல்ல என்றும் மற்றொரு தரப்பினர் தங்களது மாற்று கருத்துக்களைப் பகிர்ந்து வருகின்றனர்.