பகீர்..! “அமெரிக்க குடிநீர் விநியோக கட்டுப்பாட்டை பறித்த சைபர் கும்பல்” ஈரானை நோக்கி நீளும் சந்தேக விரல்..? வெளிவரும் ரகசியங்கள்..!!

அமெரிக்காவின் பல்வேறு மாநிலங்களில் உள்ள குடிநீர் மற்றும் கழிவுநீர் நிர்வாக அமைப்புகள் மீது அடுத்தடுத்து சைபர் தாக்குதல்கள் நடத்தப்பட்டிருப்பது அந்நாட்டு அதிகாரிகளிடையே பெரும் கவலையை ஏற்படுத்தியுள்ளது. மினசோட்டா உள்ளிட்ட குறைந்தது ஏழு மாநிலங்களில் உள்ள 30-க்கும் மேற்பட்ட நீர் அமைப்புகள் இந்தத் தாக்குதலால் பாதிக்கப்பட்டுள்ளதாகத் தெரிவிக்கப்படுகிறது. இந்தத் தாக்குதல்களின் பின்னணியில் ஈரானுடன் தொடர்புடைய சைபர் குழுக்கள் இருக்கலாம் என்று பலத்த சந்தேகம் எழுந்துள்ள போதிலும், அமெரிக்க அதிகாரிகள் இதுவரை இறுதி குற்றச்சாட்டை அதிகாரப்பூர்வமாக உறுதி செய்யவில்லை.

அமெரிக்காவில் உள்ள பெரும்பாலான நகரங்கள் தானியங்கி மற்றும் தொலைநிலை கண்காணிப்பு போன்ற டிஜிட்டல் தொழில்நுட்பங்களின் உதவியுடன்தான் குடிநீரை விநியோகம் செய்கின்றன. தற்போதைய தாக்குதலில் இணையத்துடன் இணைக்கப்பட்ட நீர் நிர்வாக சாதனங்கள் மற்றும் கட்டுப்பாட்டு அமைப்புகளின் கடவுச்சொற்கள் மாற்றப்பட்டதால் ஊழியர்களின் தொலைநிலை கட்டுப்பாடு பாதிக்கப்பட்டுள்ளது. இதன் விளைவாகச் சில பகுதிகளில் நீர் விநியோகத்தில் இடையூறு ஏற்பட்டு, முன்னெச்சரிக்கையாகக் குடிநீரைக் கொதிக்க வைத்துப் பயன்படுத்துமாறு அறிவுறுத்தப்பட்டுள்ளது. இருப்பினும், குடிநீர் விஷமாக்கப்பட்டதாகவோ அல்லது பொதுமக்களுக்குப் பெரிய அளவில் உடல்நலப் பாதிப்பு ஏற்பட்டதாகவோ எந்தத் தகவலும் இல்லை.

சிறிய நகரங்களின் நீர் நிலையங்கள் போதிய பாதுகாப்பு இல்லாமல் வெளிப்புற இணையத் தொடர்பை நம்பியிருப்பதும், பிரத்யேக சைபர் பாதுகாப்பு குழுக்கள் இல்லாததுமே ஹேக்கர்களுக்குச் சாதகமாக மாறியுள்ளது. இதனால் அமெரிக்காவின் சைபர் பாதுகாப்பு முகமையான சிசா (CISA), நீர் நிறுவனங்கள் தங்களது கட்டுப்பாட்டு சாதனங்களை இணையத்திலிருந்து தனிமைப்படுத்தி கடவுச்சொல் பாதுகாப்பை வலுப்படுத்த வேண்டும் என்று அறிவுறுத்தியுள்ளது. இந்தச் சம்பவம் சைபர் போர்கள் என்பது வெறும் அரசு அலுவலகங்கள் அல்லது ராணுவத்தோடு முடிந்துவிடுவதில்லை, மக்களின் அத்தியாவசிய சேவைகளையும் அச்சுறுத்தும் என்பதால் இது தேசிய பாதுகாப்பின் முக்கிய அங்கமாக மாறியுள்ளதை உணர்த்துகிறது.