“சார்! என் மனைவியை காய்கறி விற்று படிக்க வைத்தேன்.. ஆனா …” SP ஆபீசில் உடைந்து அழுத கணவன்.. பெண் போலீசின் பகீர் பின்னணி..!!

பீகாரின் கதிஹார் மாவட்டத்தில், வறுமையிலும் தன் மருமகளைப் படிக்க வைத்துப் பெண் காவலராக்கிய மாமனாருக்கும் கணவருக்கும், தற்போது அந்தப் பெண் துரோகம் செய்துள்ளதாகக் கூறப்படும் சம்பவம் பெரும் அதிர்ச்சியை ஏற்படுத்தியுள்ளது. உத்தரப் பிரதேசத்தைப் பூர்வீகமாகக் கொண்ட ஹன்ஸ் லால் மற்றும் பிரதிபா விஸ்வகர்மா ஆகிய இருவரும் காதலித்து, 2022-இல் நீதிமன்றத் திருமணம் செய்து கொண்டனர். திருமணத்தின் போது பிரதிபாவிற்கு வேலை இல்லாததால், காய்கறி வியாபாரியான கணவர் ஹன்ஸ் லாலும், மின்சார ஆட்டோ ஓட்டும் மாமனார் பரமஹன்ஸ் குப்தாவும் தங்களின் ஏழ்மையான சூழ்நிலையிலும் பாடுபட்டு பிரதிபாவின் கல்விச் செலவை ஏற்றுக்கொண்டனர். காவலராக வேண்டும் என்ற தனது இளமைக்காலக் கனவை மருமகள் மூலமாக நிறைவேற்ற எண்ணிய மாமனார், இரவும் பகலும் ஆட்டோ ஓட்டி அவரைப் படிக்க வைத்துள்ளார்.
அவர்களின் கடின உழைப்பிற்குப் பலனாக பிரதிபாவிற்கு பீகார் காவல்துறையில் பெண் காவலர் வேலை கிடைத்து, கதிஹாரின் மன்சாஹி காவல் நிலையத்தில் முதல் பணி நியமனமும் செய்யப்பட்டது. ஆனால், அவர் காக்கிச் சீருடையை அணிந்த உடனே குடும்பத்தினருடனான நடத்தை மாறத் தொடங்கியதாகக் கணவர் குற்றம் சாட்டுகிறார். நாளடைவில் தொலைபேசி உரையாடல்கள் குறைந்து கணவரிடமிருந்து அவர் விலகத் தொடங்கியுள்ளார். இந்த நிலையில், மகேஷ்குண்டாவைச் சேர்ந்த ராகுல் ஷர்மா என்ற இளைஞருடன் பிரதிபாவிற்கு நெருங்கிய தொடர்பு ஏற்பட்டுள்ளது. ஆரம்பத்தில் ராகுலைத் தனது சகோதரர் என்று கூறிய பிரதிபாவின் கைபேசியில், அவதூறான புகைப்படங்களையும் உரையாடல்களையும் கணவர் கண்டறிந்ததை அடுத்து, இருவருக்குள்ளும் கடுமையான மோதல் வெடித்தது.
தற்போது, தனது மனைவியின் துரோகத்தால் நிலைகுலைந்த கணவர் ஹன்ஸ் லாலும், குடும்பத்தைக் காப்பாற்றத் துடிக்கும் மாமனாரும் கதிஹார் காவல் கண்காணிப்பாளர் பரிச்சய் குமாரை சந்தித்து கண்ணீருடன் நியாயம் கேட்டு மனு அளித்துள்ளனர். வறுமையில் ஆட்டோ ஓட்டி மருமகளைப் படிக்க வைத்த மாமனார், இன்று தன் மகனின் திருமண வாழ்க்கையைக் காப்பாற்றக் காவல் நிலைய வாசலில் காத்துக் கிடக்கிறார். இந்த விவகாரத்தைக் கையில் எடுத்துள்ள காவல் கண்காணிப்பாளர், இது ஒரு தனிப்பட்ட குடும்பப் பிரச்சினை என்பதால், மகளிர் காவல் நிலையம் மூலம் இரு தரப்பினரையும் அழைத்துச் சமரசக் கலந்தாய்வு நடத்தப்படும் என்று உறுதியளித்துள்ளார். இச்சம்பவம் தற்போது கதிஹார் பகுதியில் பெரும் பரபரப்பை ஏற்படுத்தியுள்ளது.