“மருத்துவ சான்றிதழ் கொண்டு வா..” தாத்தாவுக்கு உடம்பு சரியில்லைனு பொய் சொல்லி லீவு கேட்ட ஊழியர்… கடைசியில் மேலாளர் வச்ச செக்..!!

துர்கா பூஜை விழாவை முன்னிட்டு கொல்கத்தாவிற்குச் செல்ல விடுப்பு கிடைக்காததால், ஊழியர் ஒருவர் தனது தாத்தாவின் உடல்நிலை சரியில்லை என மேலாளரிடம் பொய் கூறி விடுப்பு கேட்க முற்பட்ட சம்பவம் சமூக வலைதளங்களில் விவாதத்தைக் கிளப்பியுள்ளது. தற்போது பணியில் சேர்ந்த புதிய ஊழியர் ஒருவர், துர்கா பூஜை பண்டிகையைக் கொண்டாடுவதற்காகத் தனது சொந்த ஊரான கொல்கத்தாவிற்குச் செல்ல திட்டமிட்டுள்ளார். ஆனால், அவரிடம் ஊதியத்துடன் கூடிய விடுப்புகள் எதுவும் கையிருப்பில் இல்லை. இதனால் ஊதியமில்லா விடுப்பு கேட்க நினைத்த அவர், நேர்மையாகக் காரணத்தைக் கூறினால் விடுப்பு கிடைக்காது என்ற அச்சத்தில், கொல்கத்தாவில் இருக்கும் தனது தாத்தா கடுமையாகப் பாதிக்கப்பட்டுள்ளதாக மேலாளரிடம் பொய் கூறியுள்ளார்.

ஊழியரின் கூற்றைக் கேட்ட மேலாளர், விடுப்பு வழங்குவதற்கு முன்பாகத் தாத்தாவின் மருத்துவச் சான்றிதழ் மற்றும் மருத்துவமனை ஆவணங்களைச் சமர்ப்பிக்குமாறு வற்புறுத்தியுள்ளார். பொய்யான காரணத்தைக் கூறியதால் ஆவணங்களைச் சமர்ப்பிக்க முடியாமல் திணறிய அந்த ஊழியர், தனது நிலையை இணையதளத்தில் பகிர்ந்து, ‘தற்போது நான் என்ன செய்வது? மருத்துவ ஆவணங்களை எப்படிக் கேட்பது?’ என்று நெட்டிசன்களிடம் ஆலோசனை கேட்டுப் பதிவிட்டுள்ளார்.

இந்தச் செய்தி சமூக வலைதளங்களில் வெளியாகி வைரலானதைத் தொடர்ந்து, பயனர்கள் பலவிதமான கருத்துகளைத் தெரிவித்து வருகின்றனர். சிலர் “ஒரு ஊழியரின் குடும்பத்தினரின் மருத்துவ ஆவணங்களைக் கேட்பதற்கு நிறுவனத்திற்கு உரிமை இல்லை” என்றும், வேறு சிலர் “நிறுவனத்தை ஏமாற்ற பொய் சொன்னது தவறு, இதனால் வேலைக்கே ஆபத்து வரக்கூடும்” என்றும் காரசாரமாக விவாதித்து வருகின்றனர்.