“வறுமையைப் பயன்படுத்தும் கொடூரம்” கரும்புத் தோட்ட வேலைக்காகப் பெண்களின் கர்ப்பப்பையை அகற்றும் அவலம்.. என்ன காரணம்..? அதிரவைக்கும் பின்னணி.!! – cinefeeds
Connect with us

LATEST NEWS

“வறுமையைப் பயன்படுத்தும் கொடூரம்” கரும்புத் தோட்ட வேலைக்காகப் பெண்களின் கர்ப்பப்பையை அகற்றும் அவலம்.. என்ன காரணம்..? அதிரவைக்கும் பின்னணி.!!

Published

on

மகாராஷ்டிர மாநிலம் பீடு மாவட்டத்தில் உள்ள கரும்புத் தோட்டங்களில் பணிபுரியும் ஏழைப் பெண் தொழிலாளர்கள், மாதவிடாய் அல்லது கர்ப்பம் காரணமாகத் தங்களுக்கு வேலைநாட்கள் மற்றும் ஊதியம் வீணாகக் கூடாது என்பதற்காகத் தங்களது கர்பப்பையை அறுவை சிகிச்சை மூலம் அகற்றி வரும் அவலம் அரங்கேறி வருகிறது. இவ்வாறு கர்பப்பை நீக்கம் செய்யப்படும் பெண்களில் பலர் 25 வயதிற்கும் குறைவான இளம் பெண்கள் என்பது நெஞ்சை உலுக்கும் உண்மையாகும். இணையதளங்களில் பெண்கள் முன்னேற்றம் மற்றும் பெண் சவால்கள் குறித்துப் பேசுபவர்கள் கவனிக்க வேண்டிய மிக முக்கியப் பிரச்சனையாக இது உருவெடுத்துள்ளது.

ஒவ்வொரு ஆண்டும் கரும்பு அறுவடைக் காலங்களில் சுமார் 1.5 லட்சத்திற்கும் அதிகமான புலம்பெயர் தொழிலாளர்கள் பீடு மாவட்டத்திற்கு வருகின்றனர். இதில் 50 முதல் 60 சதவீதம் பேர் பெண்கள் ஆவர். வார இறுதி விடுமுறைகள் ஏதுமின்றி, தினமும் 12 முதல் 15 மணி நேரம் வரை இவர்கள் விலங்குகளை விட மோசமாக நடத்தப்படுகிறார்கள். மாதவிடாய் வலி, கடுமையான கர்ப்ப காலம் அல்லது கருச்சிதைவு போன்ற எந்தவொரு இக்கட்டான உடல்நலச் சூழலிலும் அவர்கள் ஓய்வெடுக்க முடியாமல் தொடர்ந்து உழைக்க வேண்டிய கட்டாயத்தில் உள்ளனர்.

Advertisement

இங்கு ஒரு தொழிலாளியின் தினசரி வருமானம் 400 முதல் 500 ரூபாய் வரை மட்டுமே கிடைக்கிறது. ஆனால், உடல்நலக் குறைவால் ஒரு நாளோ அல்லது அரை நாளோ விடுப்பு எடுத்தால், அதற்குத் தண்டனையாக 500 முதல் 1000 ரூபாய் வரை அபராதம் விதிக்கப்படுகிறது. இதனால், அவர்கள் வேறு வழியின்றி 40 முதல் 50 கிலோ எடையுள்ள கரும்புச் சுமைகளைத் தலையில் சுமந்து வேலை செய்கிறார்கள். இந்த மிகக்கடினமான வேலைக்கு நடுவிலும், அவர்கள் தங்களின் வீடுகளுக்குச் சென்று குடும்பத்தினருக்கும் சமைத்துப் பராமரிக்க வேண்டியுள்ளது.

மேலும், இவர்கள் தங்கியிருக்கும் மோசமான வாழ்விடச் சூழல்களால், மாதவிடாய் காலங்களில் தூய்மையற்ற துணிகளைப் பயன்படுத்த வேண்டிய நிலைக்குத் தள்ளப்பட்டு, கடுமையான கிருமித் தொற்றுகளுக்கு (Infections) ஆளாகிறார்கள். இவர்களின் வறுமையையும் படிப்பறிவின்மையையும் தங்களுக்குச் சாதகமாகப் பயன்படுத்திக் கொள்ளும் சில மருத்துவர்கள், இந்தச் சிறிய அறுவை சிகிச்சையைச் செய்து கொண்டால் எல்லாம் சரியாகிவிடும், இல்லையெனில் புற்றுநோய் வரக்கூடும் எனப் பயமுறுத்துகிறார்கள். இதனால் பயந்துபோகும் பெண்களும், மாதவிடாய் நின்றால் அபராதம் செலுத்தத் தேவையில்லை எனக் கருதி இதற்குச் சம்மதிக்கின்றனர். அதிகாரப்பூர்வத் தரவுகளின்படி, அங்கு 13,000 பெண்களின் கர்பப்பை அகற்றப்பட்டுள்ளது; மேலும் 2024-இல் மட்டும் அறுவடைக்கு முன்பே 843 பெண்களுக்கு இந்த அறுவை சிகிச்சை செய்யப்பட்டுள்ளது. அதேபோல, 1,523 கர்ப்பிணிப் பெண்கள் முழு நேரமும் வயல்களில் வேலை செய்து வந்த நிலையில், போதிய மருத்துவமனை வசதிகள் இல்லாததால் பலமுறை வயல்களிலேயே பிரசவம் நடக்கும் அவலமும் தொடர்கிறது.

Advertisement
Continue Reading
Advertisement

Copyright © 2023 www.cinefeeds.in