“ஒரு டிஷ்ஷுக்கு ரூ.1000…!” சொந்த கணவரையே அதிரவைத்த மனைவி… பின்னணியில் இப்படி ஒரு பிளானா..?!

குருகிராமைச் சேர்ந்த உணவு உள்ளடக்க உருவாக்குநரான பிரியா, வீட்டில் உணவகம் அல்லது கேஃபே பாணியில் சிறப்பு உணவுகளைச் சமைக்கும் போது, அவரது கணவர் ஒவ்வொரு டிஷ்ஷுக்கு 1,000 ரூபாய் வழங்குவதாக வெளியிட்ட வீடியோ சமூக வலைதளங்களில் வைரலாகி பெரும் விவாதத்தை ஏற்படுத்தியுள்ளது. சிலர் இந்த யோசனையைப் பாராட்டிய நிலையில், பலர் கணவன்-மனைவி உறவைப் பணத்துடன் தொடர்புபடுத்துவதாக விமர்சித்தனர். இதற்கு விளக்கமளித்த பிரியா, இந்த 1,000 ரூபாய் என்பது உணவின் விற்பனை விலை அல்ல என்றும், ஒரு சிறப்பு உணவைத் திட்டமிட்டு, பொருட்கள் வாங்கி, தயாரித்து, அழகாகப் பரிமாறுவதற்குப் பின்னால் இருக்கும் உழைப்பு, நேரம் மற்றும் படைப்பாற்றலுக்கான பாராட்டு என்றும் தெளிவுபடுத்தியுள்ளார்.

சண்டிகரைச் சேர்ந்த பிரியா ஃபேஷன் டிசைனிங் படித்து சொந்தமாக ஆடை பிராண்ட் நடத்தி வந்தவர். திருமணத்திற்குப் பிறகு 2023-இல் குருகிராமிற்கு வந்து உணவு உள்ளடக்கங்களை உருவாக்கத் தொடங்கினார். இந்த 1,000 ரூபாய் பழக்கம் ஒரு நகைச்சுவையான உரையாடலில் இருந்தே தொடங்கியது. ஒரு நாள் வீட்டுப் பொறுப்புகளைப் பகிர்வது பற்றிப் பேசும்போது, வீட்டில் கேஃபே பாணி உணவை சமைப்பதற்கும் ஒரு மதிப்பு இருக்க வேண்டும் என பிரியா விளையாட்டாகக் கூறினார். அதற்கு அவரது கணவர், வெளியில் சென்று கேஃபேக்களில் செலவு செய்வதற்குப் பதிலாக, அதே பணத்தை மனைவியின் திறமைக்கு வழங்குவது சிறந்தது என ஏற்றுக்கொண்டார். இதன்படி, தற்போது பிரியாவிற்கு மாதத்திற்குச் சுமார் 15,000 முதல் 20,000 ரூபாய் வரை கிடைக்கிறது.

https://www.instagram.com/reel/DZ4KswXSR_s/?utm_source=ig_web_button_share_sheet

இந்தத் தொகையைத் தன் கணவரிடமிருந்து பெறும் வருமானமாகக் கருதாமல், இல்லத்தரசிகளின் கண்ணுக்குத் தெரியாத உழைப்பிற்குக் கிடைக்கும் மரியாதையாகவே பிரியா பார்க்கிறார். இதனால் வெளி உணவகங்களில் வீணாகும் பணம் சேமிக்கப்படுவதோடு, குடும்பத்திற்குத் தூய்மையான, ஆரோக்கியமான மற்றும் சுவையான உணவும் கிடைக்கிறது. எந்தவொரு உறவிலும் ஒருவரின் உழைப்பையும் நேரத்தையும் மதிப்பது மிகவும் அவசியமானது என்றும், வீட்டு வேலைகளுக்கும் உரிய முக்கியத்துவம் அளித்தால் குடும்ப உறவுகள் மேலும் வலுப்பெறும் என்றும் பிரியா தெரிவித்துள்ளார்.