நெஞ்சை உலுக்கும் புகைப்படம்.. “82% காசா உருக்குலைந்தது” கூகுள் எர்த் புகைப்படங்களைப் பகிர்ந்து ஹாலிவுட் நடிகை ஏஞ்சலினா ஜோலி கதறல்..!!!

புகழ்பெற்ற ஹாலிவுட் நடிகையும், ஐநா சபையின் முன்னாள் தூதருமான ஏஞ்சலினா ஜோலி , இஸ்ரேலிய தாக்குதலால் பேரழிவுக்குள்ளான காசாவின் அவலத்தை வெளிப்படுத்தும் கூகுள் எர்த் செயற்கைக்கோள் புகைப்படங்களைத் தனது இன்ஸ்டாகிராம் பக்கத்தில் பகிர்ந்து ஆழ்ந்த கவலை தெரிவித்துள்ளார். காசாவில் என்ன நடந்துள்ளது என்பதை இப்போது கூகுள் எர்த் மூலம் யார் வேண்டுமானாலும் நேரடியாகக் காண முடியும் என்று அவர் குறிப்பிட்டுள்ளார். போர் தொடங்குவதற்கு முன்பும், தற்போதும் அங்குள்ள பகுதிகள் எப்படி மாறியுள்ளன என்பதை இந்த ஒப்பீட்டுப் புகைப்படங்கள் துல்லியமாகக் காட்டுகின்றன.

ஐநா சபையின் செயற்கைக்கோள் பகுப்பாய்வுத் தரவுகளை மேற்கோள் காட்டி அவர் வெளியிட்டுள்ள பதிவில், காசாவில் உள்ள ஒட்டுமொத்த உள்கட்டமைப்புகளில் 82 சதவீதக் கட்டிடங்கள் மற்றும் உள்கட்டமைப்புகள் சேதமடைந்துள்ளதாகக் குறிப்பிட்டுள்ளார். மேலும், இவ்வாறு சேதமடைந்த கட்டிடங்களில் கிட்டத்தட்ட மூன்றில் இரண்டு பங்கு கட்டிடங்கள் முழுமையாக அழிக்கப்பட்டு, குடியிருப்புப் பகுதிகள் அனைத்தும் வெறும் இடிபாடுகளாக மாறியுள்ளதாக அவர் வேதனை தெரிவித்துள்ளார். வீடுகள், பள்ளிகள், மருத்துவமனைகள் மற்றும் குடிநீர் விநியோகக் கட்டமைப்புகள் எனப் பொதுமக்கள் உயிர்வாழத் தேவையான அடிப்படை வசதிகள் அனைத்தும் அங்கு சீர்குலைந்துள்ளன.

காசாவில் தற்பொழுது குளிர்காலம் நெருங்கி வரும் நிலையில், அங்கிருக்கும் சுமார் 1.98 மில்லியன் மக்களுக்கு (அதாவது மக்கள் தொகையில் 94% பேருக்கு) அவசரமாகத் தங்குமிட உதவியும் அத்தியாவசியப் பொருட்களும் தேவைப்படுவதாக ஏஞ்சலினா ஜோலி சுட்டிக்காட்டியுள்ளார். செயற்கைக்கோள் புகைப்படங்கள் வெறும் கட்டிட இழப்புகளை மட்டுமே காட்டுகின்றன என்றும், ஆனால் தப்பிப்பிழைத்த மக்களின் சொல்லொணாத் துயரங்களையும், உயிரிழந்த குடும்பங்களின் வலியையும் இதனால் விவரிக்க முடியாது என்றும் அவர் கூறியுள்ளார். எனவே, அங்குள்ள மக்களுக்குத் தேவையான நிவாரணப் பொருட்கள் மற்றும் மருத்துவ உதவிகள் தங்கு தடையின்றிச் சென்றடைய சர்வதேச சமூகம் உடனடியாக நடவடிக்கை எடுக்க வேண்டும் என அவர் வலியுறுத்தியுள்ளார்.