“துப்பாக்கியை தூக்கிய கைகளில் காபி கப்..” வன்முறைப் பாதையை விட்டு உழைப்பைத் தேர்ந்தெடுத்த முன்னாள் நக்சலைட்டுகள்..!!

சத்தியஸ்கர் மாநிலம் பஸ்தாரில், நக்சலைட்டுகளுக்கு எதிரான நடவடிக்கைகள் தீவிரமாக நடைபெற்று வரும் சூழலில், அங்கு ஒரு புதிய நேர்மறையான மாற்றம் ஏற்பட்டுள்ளது. ஒரு காலத்தில் காடுகளில் துப்பாக்கி மற்றும் வெடிமருந்துகளுடன் வன்முறைப் பாதையில் பயணித்த முன்னாள் நக்சலைட்டுகள், தற்போது அரசின் முன் சரணடைந்து, மறுவாழ்வுத் திட்டங்களின் மூலம் சமூகத்தின் முதன்மை நீரோட்டத்திற்குத் திரும்பி, அமைதியான வாழ்க்கையைத் தொடங்கியுள்ளனர்.

பஸ்தாரில் உள்ள ‘கேஃபே படும்’ என்ற உணவகத்தில், சரணடைந்த இந்த முன்னாள் நக்சலைட்டுகள் காபி தயாரிப்பது மற்றும் அதை வாடிக்கையாளர்களுக்குப் பரிமாறுவது போன்ற பணிகளைக் கற்றுக்கொண்டு பணியாற்றி வருகின்றனர். லக்கானு போயம் என்பவரும் அவரது ஐந்து தோழர்களும் சமீபத்தில் சரணடைந்து, தற்போது இந்த கேஃபேயில் பணிபுரிந்து வருகின்றனர். தங்களுக்கு இந்த வேலை மூலம் புதிய வாழ்க்கையைத் தொடங்குவதற்கான நல்ல வாய்ப்பும், பல புதிய விஷயங்களைக் கற்றுக்கொள்ளும் வாய்ப்பும் கிடைத்துள்ளதாக லக்கானு போயம் தெரிவித்துள்ளார்.

துப்பாக்கிகளை ஏந்திய கரங்கள் இன்று உழைப்பின் மூலம் காபி தயாரிப்பது, பஸ்தாரில் வன்முறை குறைந்து அமைதியும் வளர்ச்சியும் மலர்வதைக் காட்டுகிறது. சரணடைந்தவர்களுக்கு வேலைவாய்ப்பும், சமூகத்தின் நம்பிக்கையும் மீண்டும் கிடைப்பது மிகப்பெரிய சவாலாக இருக்கும் நிலையில், இதுபோன்ற உணவகப் பணிகள் அவர்களின் வாழ்க்கைக்கு ஒரு புதிய திசையையும் நம்பிக்கையையும் அளித்து, அவர்களை நல்வழிப்படுத்த பெரிதும் உதவுகின்றன.