“என் மகளை எப்படியாவது காப்பாத்துங்க..” 20 முறை கெஞ்சிய தாய்.. மருத்துவர்களின் அலட்சியத்தால் பிரசவ வார்டில் பெண்ணிற்கு நேர்ந்த கொடூரம்.. நெஞ்சை உலுக்கும் சம்பவம்..!!

ஹரியானா மாநிலம் பானிபட் மாவட்ட அரசு சிவில் மருத்துவமனையின் பிரசவ வார்டில் பெண் ஒருவர் சிகிச்சை பலனின்றி உயிரிழந்ததைத் தொடர்ந்து அவரது குடும்பத்தினர் மருத்துவமனையை முற்றுகையிட்டுப் பெரும் போராட்டத்தில் ஈடுபட்டனர். பாதிக்கப்பட்ட குடும்பத்தினரின் குற்றச்சாட்டின்படி, பிரசவ வார்டில் இருந்த அந்தப் பெண்ணுக்குச் சுவாசிப்பதில் கடுமையான சிரமம் ஏற்பட்டு, அவசரமாக ஆக்சிஜன் தேவைப்பட்டுள்ளது. இதற்காக அந்தப் பெண்ணின் தாய், அங்கிருந்த மருத்துவர்கள் மற்றும் மருத்துவப் பணியாளர்களிடம் சுமார் 15 முதல் 20 முறை நேரில் சென்று, தனது மகளுக்கு ஆக்சிஜன் வழங்குமாறு கைகளைக் கூப்பிக் கண்ணீருடன் கெஞ்சியுள்ளார். ஆனால், மருத்துவமனை நிர்வாகம் உரிய நேரத்தில் ஆக்சிஜன் வழங்கத் தவறியதாகக் கடுமையான குற்றச்சாட்டு எழுந்துள்ளது.

தன் மகளின் உயிரைக் காப்பாற்ற அந்தத் தாய் மருத்துவர்களிடம் மீண்டும் மீண்டும் மன்றாடியும், மருத்துவப் பணியாளர்களின் அலட்சியத்தால் உரிய நேரத்தில் சிகிச்சை கிடைக்காமல் அந்தப் பெண் பரிதாபமாக உயிரிழந்தார். இந்தச் சோகமான சம்பவம் பானிபட் பகுதியில் பெரும் கொந்தளிப்பை ஏற்படுத்தியுள்ளது. பாதிக்கப்பட்ட குடும்பத்தினரின் இந்த அதிரடிக் குற்றச்சாட்டுகள் உண்மையாக இருக்கும் பட்சத்தில், உயிரைக் காக்கும் உன்னதப் பணியில் இருக்கும் இந்த மருத்துவர்கள் ஏன் ஒரு தாயின் கதறலையும், நோயாளியின் அவசரத் தேவையையும் சற்றும் பொருட்படுத்தாமல் இவ்வளவு பெரிய அலட்சியத்தைக் காட்டினார்கள் என்ற பலத்த கேள்வி எழுந்துள்ளது.