பட்டப்பகலில் நடந்த பயங்கர சம்பவம்..! லஷ்கர்-இ-தைபா தளபதி சுட்டுக்கொலை… வைரலாகும் பகீர் வீடியோ..!!

பாகிஸ்தானில் பயங்கரவாத அமைப்பான லஷ்கர்-இ-தைபாவின் மூத்த தளபதி இம்ரான் என்பவரை அடையாளம் தெரியாத நபர் ஒருவர் பட்டப்பகலில் சுட்டுக்கொன்றதாகக் கூறி சமூக வலைதளங்களில் ஒரு வீடியோ வைரலாகி வருகிறது. அக்டோபர் 13, 2026 அன்று காலை 11:54 மணி என்ற நேர முத்திரையுடன் பரவும் அந்த வீடியோவில், வளாகத்தின் வாயிலிலிருந்து ஒருவர் மோட்டார் சைக்கிளில் வெளியே வருகிறார். அப்போது வெள்ளை நிற ஆடை அணிந்த நபர் ஒருவர் அவரை நோக்கி வந்து திடீரென துப்பாக்கிச்சூடு நடத்துகிறார்.

துப்பாக்கிச்சூடு நடந்ததும் மோட்டார் சைக்கிளில் வந்தவர் தப்பிக்க முயன்று வாகனத்தின் கட்டுப்பாட்டை இழந்து கீழே விழுகிறார். அதன்பின்னரும் தாக்குதல் நடத்திய நபர் அவரைத் தொடர்ந்து சுடுகிறார். தாக்குதலுக்குப் பிறகு, அந்த நபர் தான் பயன்படுத்திய துப்பாக்கிகளுடன் அங்கிருந்து தப்பிச் செல்கிறார். சுடப்பட்ட நபர் சாலையிலேயே அசைவற்று விழுந்து கிடப்பதுடன் அந்த வீடியோ முடிவடைகிறது.

இந்த வீடியோவில் சுடப்பட்டவர் லஷ்கர்-இ-தைபாவின் தளபதி இம்ரான் தான் என்று கூறப்பட்டாலும், சுடப்பட்ட நபரின் அடையாளம், சம்பவம் நடந்த இடம் மற்றும் நிகழ்வின் உண்மைத்தன்மை ஆகியவை சுயாதீனமாக இன்னும் உறுதி செய்யப்படவில்லை. மேலும், பாகிஸ்தான் அதிகாரிகளிடமிருந்தும் இது குறித்து இதுவரை எந்தவொரு அதிகாரப்பூர்வ அறிவிப்பும் அல்லது உறுதிப்படுத்தலும் வெளியாகவில்லை.