வேட்பாளர்களை விட அதிக பதற்றம்.. இடைதேர்தல் “ரிசல்ட்டுக்கு” நடுங்கிக்கொண்டிருக்கும் தவெக முக்கிய புள்ளிகள்.. வெளியான பரபரப்பு தகவல்..!!

தமிழகத்தில் 2026 சட்டமன்றத் தேர்தலில் வெற்றி பெற்று தவெக கூட்டணி ஆட்சி அமைத்துள்ள சூழலில், தாராபுரம் மற்றும் மதுராந்தகம் தொகுதிகளில் அதிமுக சார்பில் போட்டியிட்டு வெற்றி பெற்று, பின்னர் தங்களது பதவிகளை ராஜினாமா செய்துவிட்டு தவெக-வில் இணைந்த சத்யபாமா மற்றும் மரகதம் குமரவேல் ஆகிய இருவருக்கே மீண்டும் தவெக சார்பில் இடைத்தேர்தல் வாய்ப்பு அளிக்கப்பட்டிருப்பது தமிழக அரசியல் களத்தில் பெரும் சலசலப்பை ஏற்படுத்தியுள்ளது. தவெக-வின் இந்த முடிவிற்குப் பொதுமக்களும் தொகுதி வாக்காளர்களும் கடுமையான கோபத்தையும் அநாகரிகமான விமர்சனங்களையும் முன்வைத்து வரும் வேளையில், தவெக கூட்டணியில் இருக்கும் காங்கிரஸ் கட்சியின் எம்பி கார்த்தி சிதம்பரம், “ராஜினாமா செய்தவர்களுக்கு மீண்டும் வாய்ப்பு அளித்திருக்கக் கூடாது; கட்சியின் நீண்டகால உறுப்பினர்களுக்கு இந்த வாய்ப்பை வழங்கிப் புதியவர்களைக் காத்திருக்கச் சொல்லியிருக்க வேண்டும்” எனத் தனது அதிருப்தியை வெளிப்படையாகப் பதிவு செய்துள்ளார். அதேபோல, தவெக அரசுக்கு வெளியில் இருந்து ஆதரவளிக்கும் சிபிஐ(எம்) கட்சியின் மாநிலச் செயலாளர் பெ. சண்முகம், “வாக்காளர்களுக்குத் துரோகம் இழைத்த இந்த இரண்டு வேட்பாளர்களையும் தோற்கடிப்பதே முதன்மையான கடமை” என்றும், முரண்படும் விவகாரங்களில் கம்யூனிஸ்ட் கட்சிகள் எப்போதுமே எதிர்த்து நிற்கும் என்றும் திட்டவட்டமாகக் கூறியுள்ளது ஆளுங்கட்சி கூட்டணியில் பிளவு உள்ளதா என்ற கேள்வியை எழுப்பியுள்ளது.

கூட்டணிக்குள் எழுந்துள்ள இந்த விவாதங்களுக்கு இடையே, தமிழகத்தில் தவெக ஆட்சிப் பொறுப்பேற்றது முதல் நிலவி வரும் சமூக ஒழுங்கு சீர்கேடு, தொடர் மின்வெட்டு, குடிநீர் தட்டுப்பாடு, கொலைச் சம்பவங்கள் மற்றும் விவசாயிகளின் போராட்டங்கள் போன்றவற்றால் மக்கள் அரசு மீது கடும் அதிருப்தியில் இருப்பதாக அரசியல் விமர்சகர்கள் சுட்டிக்காட்டுகின்றனர். குறிப்பாக, மின்வெட்டுப் பிரச்சினை குறித்துச் சட்ட மற்றும் எரிசக்தித் துறை அமைச்சரான சி. டி. ஆர். நிர்மல் குமாரின் பதில்களால் பொதுமக்கள் மேலும் அதிருப்தி அடைந்துள்ளதால், அவரது பதவி பறிக்கப்படலாம் அல்லது துறை மாற்றப்படலாம் என்ற சலசலப்பு கோட்டை வட்டாரத்தில் எழுந்துள்ளது. இதனால், இந்த இடைத்தேர்தலில் தவெக மிகக் குறைந்த வாக்குகள் வித்தியாசத்தில் வெற்றி பெற்றால் கூட அது “வெற்றிகரமான தோல்வியாகவே” கருதப்படும் என்பதால், தங்களது அமைச்சர் பதவிகளைத் தக்க வைத்துக் கொள்ள மக்கள் ஆதரவை விட இந்த இடைத்தேர்தல் முடிவுகளுக்காகத் தவெக அமைச்சர்களே தற்போது மிகுந்த எதிர்பார்ப்புடன் காத்துக் கிடக்கின்றனர்.