“ரோட்டையும் கொஞ்சம் பாருங்க பாஸ்..!” 100 கி.மீ வேகத்தில் வீடியோ பார்த்துக்கொண்டே பஸ் ஓட்டிய கொடூரம்..! நெஞ்சை பதறவைக்கும் காட்சி..!!

உத்தரப் பிரதேச மாநிலத்தின் அதிவேக நெடுஞ்சாலைகளில் ஒன்றான ஆக்ரா – லக்னோ நெடுஞ்சாலையில், பயணிகளின் உயிரோடு விளையாடும் வகையில் தனியார் சொகுசுப் பேருந்து ஓட்டுநர் ஒருவர் செயல்பட்ட நெஞ்சை பதறவைக்கும் வீடியோ சமூக வலைத்தளங்களில் வெளியாகி பெரும் அதிர்ச்சியை ஏற்படுத்தியுள்ளது. சுமார் 100 கி.மீ வேகத்தில் பேருந்து தறிகெட்டுச் சென்றுகொண்டிருந்த நிலையிலும், ஓட்டுநர் தனது ஸ்டீயரிங் மீது மொபைலை வைத்துக்கொண்டு, சாலையைக் கவனிக்காமல் தொடர்ந்து வீடியோ பார்த்துக் கொண்டே பேருந்தை இயக்கியுள்ளார்.

பேருந்தின் முன் இருக்கையில் அமர்ந்திருந்த பயணி ஒருவர், ஓட்டுநரின் இந்த விபரீதச் செயலைத் தனது மொபைலில் ரகசியமாகப் படம் பிடித்துள்ளார். அந்த வீடியோவில், “ரோட்டையும் கொஞ்சம் பாருங்க” என்று சொல்லத் தோன்றும் அளவுக்கு ஓட்டுநரின் பார்வை முற்றிலும் சாலையை விடுத்து மொபைல் திரையிலேயே பதிந்துள்ளது. பயணிகளின் உயிரைப் பற்றிக் கவலைப்படாமல், பேருந்தை இவ்வளவு அலட்சியமாக இயக்கிய ஓட்டுநரின் செயல் பார்ப்போரின் நெஞ்சை பதறவைக்கும் வகையில் அமைந்துள்ளது.

மேலும், அவருக்கு அருகில் அமர்ந்திருந்த நடத்துனரும் சாலையை கவனிக்காமல் படுத்துக்கொண்டே தனது மொபைல் போனைப் பயன்படுத்தியது அலட்சியத்தின் உச்சமாகப் பார்க்கப்படுகிறது. இச்சம்பவம் எப்போது நடந்தது என்பது குறித்த துல்லியமான தகவல்கள் வெளியாகாத நிலையிலும், நெடுஞ்சாலைகளில் தனியார் பேருந்து ஊழியர்களின் இத்தகைய ஆபத்தான செயல்பாடுகள் வழக்கமாகிவிட்டதாக சமூக வலைதளங்களில் குற்றச்சாட்டுகள் எழுந்துள்ளன.

இந்த வீடியோ சமூக வலைத்தளங்களில் பரவியதை அடுத்து, சம்பந்தப்பட்ட ஓட்டுநர் மீது பொதுமக்கள் மற்றும் சமூக ஆர்வலர்கள் கடும் கண்டனங்களைத் தெரிவித்து வருகின்றனர். நூற்றுக்கணக்கான பயணிகளின் உயிருக்கு ஆபத்து விளைவிக்கும் வகையில் செயல்பட்ட இந்த ஓட்டுநர் மீது போக்குவரத்துத் துறை உடனடியாகக் கடுமையான ஒழுங்கு நடவடிக்கை மற்றும் சட்டப்பூர்வ நடவடிக்கை எடுக்க வேண்டும் என்றும், அப்போதுதான் மற்ற ஓட்டுநர்களுக்கும் இது ஒரு பாடமாக அமையும் என்றும் பொதுமக்கள் கோரிக்கை விடுத்துள்ளனர்.