“வருமானம் எங்கிருந்து வந்தது..?” ஒரே கேள்வியில் தலைமறைவான பிரபல யூடியூபர் மதுமிதா.. அடுத்தடுத்து அம்பலமாகும் பகீர் ரகசியங்கள்..!!

குமரி மாவட்டம் நாகர்கோவில் அருகே உள்ள தம்மத்துகோணம் வி.ஐ.பி. நகரைச் சேர்ந்தவர் வினோத் குமார். இவரது மனைவி மதுமிதா. இந்தத் தம்பதியினர் சமூக வலைத்தளங்களான யூடியூப் மற்றும் இன்ஸ்டாகிராமில் குறும்படங்கள் மற்றும் வீடியோக்களை வெளியிட்டு பிரபலமடைந்து வந்தனர். கடந்த சில நாட்களுக்கு முன்பு மதுமிதாவின் வீட்டில் நுழைந்த மர்ம நபர்கள், அங்கிருந்த சுமார் 118 சவரன் தங்க நகைகள் மற்றும் பணத்தைக் கொள்ளையடித்துச் சென்றனர். இச்சம்பவம் அப்பகுதியில் பெரும் பரபரப்பை ஏற்படுத்தியது. இந்த துணிகரக் கொள்ளைச் சம்பவம் குறித்து வழக்குப் பதிவு செய்த சுசீந்திரம் காவல்துறையினர், தனிப்படைகள் அமைத்துத் தீவிர விசாரணை மேற்கொண்டு வந்தனர். சிசிடிவி காட்சிப் பதிவுகள் மற்றும் செல்போன் எண்களின் தடயங்களை ஆய்வு செய்த போலீசார், இக்கொள்ளை சம்பவத்தில் தொடர்புடைய முக்கியக் குற்றவாளிகளைக் கைது செய்து சிறையில் அடைத்தனர். விசாரணையில், மதுமிதாவின் சமூக வலைத்தள வீடியோக்களை வைத்தே திட்டமிட்டது தெரியவந்தது. கொள்ளைச் சம்பவத்திற்குப் பிறகும், மதுமிதா அதைப்பற்றிக் கவலைப்படாமல் தொடர்ந்து பணக்கட்டுகளுடன் நடனமாடும் வீடியோக்களையும் புகைப்படங்களையும் பதிவிட்டு வந்தார். இது இணையதளவாசிகளிடையே பெரும் விவாதப் பொருளாக மாறிய நிலையில், ஒரே நாளில் அவரது வீடியோக்களுக்கு லட்சக்கணக்கான பார்வைகளும், ஃபாலோயர்களும் அதிகரித்தனர்.

இந்நிலையில், இவ்வளவு குறைந்த காலத்தில் இந்தத் தம்பதிக்கு இத்தனை கோடிகளிலான நகைகளும் சொத்துக்களும் எவ்வாறு வந்தன என்ற சந்தேகம் காவல்துறைக்கு எழுந்தது. இதனைத் தொடர்ந்து, மதுமிதா மற்றும் அவரது கணவர் வினோத் குமாரின் பின்னணி குறித்தும், அவர்களது வருமான மூலங்கள் குறித்தும் காவல்துறையினர் தீவிர விசாரணையில் இறங்கினர். முதற்கட்ட விசாரணையில், இவர்கள் முறைகேடான தொழில் மற்றும் நிதி பரிவர்த்தனைகளில் ஈடுபட்டிருக்கலாம் என்ற திடுக்கிடும் ரகசியங்கள் ஒவ்வொன்றாக அம்பலமாகத் தொடங்கின. மேலும், இவர்களது வங்கிச் கணக்குகள் மற்றும் நிதிப் பரிவர்த்தனைகளைத் தணிக்கை செய்யக் காவல் துறை நடவடிக்கை மேற்கொண்டது. இந்த நிலையில், காவல்துறையின் விசாரணை வளையம் தங்கள் பக்கம் தீவிரமாகத் திரும்புவதை உணர்ந்த மதுமிதா மற்றும் அவரது கணவர் வினோத் குமார் திடீரென வீட்டைப் பூட்டிவிட்டுத் தலைமறைவாகினர். அவசரம் அவசரமாகத் தலைமறைவான இவர்களைப் பிடிக்கச் சுசீந்திரம் தனிப்படை போலீசார் தீவிர நடவடிக்கை எடுத்து வருகின்றனர்.

அவர்கள் எங்கு தலைமறைவாக இருக்கிறார்கள் என்பதைக் கண்டறிய அவர்களது செல்போன் எண்களின் டவர் இருப்பிடத்தை வைத்துப் போலீசார் கண்காணித்து வருகிறார்கள்.மேலும், இவர்களுக்கு யாரேனும் புகலிடம் அளித்துள்ளனரா அல்லது வேறு நபர்களின் உதவியுடன் தப்பிச் சென்றுள்ளனரா என்றும் விசாரணை நடைபெற்று வருகிறது. மதுமிதா தம்பதியினருக்குச் சொந்தமான சொகுசு பங்களா மற்றும் சொத்து விவரங்கள் குறித்த ஆவணங்களையும் காவல்துறையினர் சேகரித்து வருகின்றனர். சோதனைகள் மற்றும் விசாரணை முடிவில் இவர்களது சட்டவிரோதப் பரிவர்த்தனைகள் குறித்த முழு விவரங்களும் வெளிவரும் என்று எதிர்பார்க்கப்படுகிறது. யூடியூப் பிரபலம் வீட்டில் நகைகள் கொள்ளையடிக்கப்பட்ட வழக்கு, தற்போது அந்தப் பிரபலத்தையே போலீசார் தீவிரமாகத் தேடும் அளவிற்குப் புயலைக் கிளப்பியுள்ளது.