“தொப்பைன்னு நினைச்சா தப்பு கணக்கு!” உடம்பெல்லாம் கஞ்சா பொட்டலங்களை கட்டிக்கொண்டு நூதன கடத்தல்… மகாராஷ்டிராவில் இருவர் கைது..!!!

மகாராஷ்டிர மாநிலம் கோந்தியா மாவட்டத்தில், தங்களின் உடல் முழுவதும் கஞ்சா பொட்டலங்களைக் கட்டிக்கொண்டு நூதன முறையில் கடத்தலில் ஈடுபட்ட இரண்டு நபர்களைப் போலீசார் அதிரடியாகக் கைது செய்துள்ளனர். கோந்தியா மாவட்ட காவல்துறையின் உள்ளூர் குற்றப்பிரிவு மேற்கொண்ட வாகனச் சோதனையின்போது இந்தக் கடத்தல் முயற்சி முறியடிக்கப்பட்டது. கைது செய்யப்பட்ட நபர்கள் கோமாஜி சௌத்ரி மற்றும் லட்சுமிசந்த் பாகேல் என அடையாளம் காணப்பட்டுள்ளனர்.

போலீசாரின் சோதனையில் இருந்து தப்பிப்பதற்காகக் கடத்தல்காரர்கள் கஞ்சா பொட்டலங்களை தங்களது வயிறு, முதுகு மற்றும் கால்களில் பிளாஸ்டிக் கவர்களின் உதவியுடன் இறுக்கமாகக் கட்டியிருந்தனர். இதனால் பார்ப்பதற்கு அவர்களுக்குப் பெருவயிறு (தொப்பை) இருப்பது போலத் தோற்றமளித்துள்ளது. எனினும், இவர்களின் சந்தேகத்திற்கிடமான செயல்பாடுகளால் சந்தேகமடைந்த போலீசார் சோதனை செய்தபோது இந்தத் தந்திரம் அம்பலமானது. மேலும், அவர்கள் வைத்திருந்த பையில் இருந்த மூன்று டிஃபன் பாக்ஸ்களுக்குள்ளும் கஞ்சா மறைத்து வைக்கப்பட்டிருந்தது கண்டுபிடிக்கப்பட்டது.

கைது செய்யப்பட்ட இருவரிடமிருந்தும் மொத்தம் 2 கிலோ 915 கிராம் எடையுள்ள கஞ்சா, அவர்கள் பயன்படுத்திய இருசக்கர வாகனம் மற்றும் இதர பொருட்கள் உள்ளிட்ட 1 லட்சத்து 68 ஆயிரத்து 250 ரூபாய் மதிப்பிலான சொத்துக்களைப் போலீசார் பறிமுதல் செய்துள்ளனர். மத்தியப் பிரதேச மாநிலத்தைச் சேர்ந்த இவர்களோடு தொடர்புடைய பெரிய கடத்தல் நெட்வொர்க் ஏதேனும் உள்ளதா மற்றும் இந்தக் கஞ்சா எங்கு கொண்டு செல்லப்படவிருந்தது என்பது குறித்துப் போலீசார் தீவிர விசாரணை நடத்தி வருகின்றனர்.