பார்க்கவே நெஞ்சு நடுங்குது..! ஜெனரேட்டர் மீது அமர்ந்து 4-வது மாடிக்குச் சென்ற தொழிலாளர்கள்… அடுத்த நொடியே நடந்த கொடூரம்… பதைபதைக்க வைக்கும் சிசிடிவி வீடியோ..!!

ஹரியானாவின் பஞ்ச்குலா பகுதியிலுள்ள தொழில் பேட்டை ஃபேஸ்-2-வில் அமைந்துள்ள ‘மில்லியம்ஸ் இன்ஜினியர் சொல்யூஷன்ஸ்’ என்ற நிறுவனத்தின் கட்டிடத்தில் வியாழக்கிழமை மதியம் 3.30 மணியளவில் இந்த சோகமான தொழில்சாலை விபத்து ஏற்பட்டது. கட்டிடத்தின் நான்காவது மாடிக்கு ஒரு கனரக ஜெனரேட்டரை கிரேனின் உதவியுடன் மேலே தூக்கிச் சென்றபோது, கிரேன் திடீரெனத் தனது சமநிலையை இழந்து தலைகீழாகக் கவிழ்ந்தது. அப்போது ஜெனரேட்டரின் மீது அமர்ந்திருந்த இரண்டு இளம் உதவியாளர்களும் ஜெனரேட்டருடன் சேர்த்து மேலிருந்து கீழே விழுந்தனர்.

இந்த பயங்கர விபத்தின் காட்சிகள் அங்குள்ள சிசிடிவி கேமராவில் பதிவாகியுள்ளன. ஜெனரேட்டர் கீழே விழும்போது அங்குள்ள மின்சாரக் கம்பிகள் மற்றும் மின் கம்பத்தின் மீது பலமாக மோதி, பெரும் சத்தத்துடன் தரையில் விழுந்தது. இதில் பீகாரைச் சேர்ந்த மனீஷ் மற்றும் ஹிமாச்சல பிரதேசத்தைச் சேர்ந்த நவீன் ஆகிய இரு தொழிலாளர்களும் பலத்த காயமடைந்தனர். உடனே அவர்கள் செக்டார்-6 சிவில் மருத்துவமனைக்குக் கொண்டு செல்லப்பட்டனர், ஆனால் அவர்கள் ஏற்கனவே இறந்துவிட்டதாக மருத்துவர்கள் தெரிவித்தனர். மேலும் இந்த விபத்தினால் அப்பகுதியில் மின் விநியோகமும் பாதிக்கப்பட்டது.

https://www.instagram.com/reel/DcAwNl_M7mv/?utm_source=ig_web_button_share_sheet

தகவலறிந்து சம்பவ இடத்திற்கு வந்த செக்டார்-19 காவல் துறையினர், விபத்துக்குள்ளான கிரேன் மற்றும் ஜெனரேட்டரைப் பறிமுதல் செய்து விசாரணை மேற்கொண்டு வருகின்றனர். ஜெனரேட்டரை உயரே தூக்கும் போது தொழிலாளர்கள் ஏன் அதன் மீது அமர வைக்கப்பட்டார்கள் என்றும், பணியிட பாதுகாப்பு விதிமுறைகள் சரியாகப் பின்பற்றப்பட்டதா என்றும் காவல்துறை ஆய்வு செய்து வருகிறது. பிரேதப் பரிசோதனைக்குப் பிறகும், சிசிடிவி காட்சிகளைப் பரிசீலித்த பிறகும், இது தொழில்நுட்பக் கோளாறா அல்லது அலட்சியத்தால் ஏற்பட்ட விபத்தா என்பது குறித்து அடுத்தகட்ட நடவடிக்கை எடுக்கப்படும் எனப் போலீசார் தெரிவித்தனர்.