முருகன் தமிழ்நாட்டில் பிறக்கலையா?ஒரே ஒரு போஸ்டர்…படக்குழுவின் அடுத்த அதிரடி முடிவு…கொந்தளிக்கும் தமிழ் சினிமா ரசிகர்கள்!

ஜூனியர் என்.டி.ஆர் மற்றும் இயக்குனர் திரிவிக்ரம் ஸ்ரீனிவாஸ் கூட்டணியில், முருகப் பெருமானின் புராணக் கதையை மையமாக வைத்து ஒரு புதிய திரைப்படம் உருவாகி வருகிறது. அனிருத் இசையமைக்கும் இப்படத்தின் அதிகாரப்பூர்வ போஸ்டரை சமீபத்தில் தயாரிப்பாளர் நாக வம்சி தனது சமூக வலைத்தளப் பக்கத்தில் வெளியிட்டிருந்தார். அந்தப் பதிவில், “வடக்கில் பிறந்து, மையப் பகுதியில் உருவாகி, தெற்கில் வழிபடப்படுபவர்” என்ற ஒரு வாசகத்தைக் குறிப்பிட்டிருந்தார். இதில் முருகப் பெருமான் வட இந்தியாவில் பிறந்தவர் என்று சுட்டிக்காட்டப்பட்டிருந்த விஷயம், இணையத்தில் தற்போது பெரிய அளவிலான விவாதத்தை கிளப்பியுள்ளது.

இந்த வாசகம் தமிழ் மக்களிடையே கடும் அதிருப்தியையும் கோபத்தையும் ஏற்படுத்தியுள்ளது. முருகப் பெருமான் ‘தமிழ்க் கடவுள்’ என்றும், அவருடைய புகழ்வாய்ந்த அறுபடை வீடுகளும் தமிழ்நாட்டில் மட்டுமே அமைந்துள்ளன என்றும் பலர் தங்களது எதிர்ப்பை பதிவு செய்து வருகின்றனர். திரைப்படத்திற்காக தமிழர்களின் தொன்மையான வரலாற்றையும் கலாச்சாரத்தையும் திரித்துக்கூறும் அப்பட்டமான முயற்சியாக இது அமைந்திருப்பதாக நெட்டிசன்கள் படக்குழுவினர் மீது கடுமையான விமர்சனங்களை முன்வைக்கின்றனர். சினிமாவுக்காக வரலாற்றை மாற்ற வேண்டாம் எனவும் அவர்கள் தயாரிப்பாளர்களை எச்சரித்து வருகின்றனர்.

அதேநேரத்தில், படக்குழுவினரின் கருத்துக்கு ஆதரவாகவும் ஒரு தரப்பினர் குரல் கொடுத்து வருகின்றனர். முருகப் பெருமான் தமிழர்களுக்கான கடவுள் மட்டுமல்ல, இந்தியா முழுவதும் உள்ள மக்களால் பல்வேறு பெயர்களில் வழிபடப்படும் தெய்வம் என்று அவர்கள் வாதிடுகின்றனர். ஆந்திரா மற்றும் கர்நாடகாவில் சுப்ரமணிய சுவாமியாகவும், வட இந்தியாவில் கார்த்திகேயன் மற்றும் ஸ்கந்தனாகவும் அவர் வணங்கப்படுகிறார் என்பதைச் சுட்டிக்காட்டுகின்றனர். இணையத்தில் இரு தரப்பிற்கும் இடையே இந்த கலாச்சார விவாதம் தீவிரமாக நடைபெற்று வரும் நிலையிலும், படக்குழு தரப்பில் இருந்து இதுவரை இந்த சர்ச்சைக்கு எந்த விளக்கமும் அளிக்கப்படவில்லை.