“எங்க அப்பா பாத்துப்பார்…” சட்டத்தை ஏளனம் செய்யும் செல்வாக்கு.. மினி கூப்பர் விபத்தில் கை கோர்க்கும் போலீஸ்… கொதித்தெழுந்த கேரள மக்கள்..!!

கேரள மாநிலம் கொச்சி அருகே நெடுமாச்சேரி விமான நிலைய சாலையில், அதிவேகமாக வந்த மினி கூப்பர் கார் ஸ்கூட்டர் மீது மோதிய விபத்தில் 3 பேர் பரிதாபமாக உயிரிழந்தனர். ஞாயிற்றுக்கிழமை அதிகாலை நடைபெற்ற இந்த கோர விபத்தில், மதுபோதையில் காரை ஓட்டியதாகக் கூறப்படும் 19 வயது இளைஞர் சுஹைல் மற்றும் அவருடன் காரில் பயணித்தவர்கள் மீது கடுமையான குற்றச்சாட்டுகள் எழுந்துள்ளன. விபத்து நடந்தவுடன் எந்தவித குற்ற உணர்ச்சியும் இன்றி செயல்பட்ட அந்த இளைஞர், “என்ன பிரச்சனை வந்தாலும் என் அப்பா பார்த்துக்கொள்வார்” என்று திமிராகக் கூறியதுடன், விபத்துக்கான காரணம் குறித்துக் பொதுமக்களிடம் அலட்சியமாகப் பேசியதும் கடும் கொந்தளிப்பை ஏற்படுத்தியுள்ளது.

இந்த விபத்து வழக்கில் ஆரம்பத்தில் பதிவு செய்யப்பட்ட முதல் தகவல் அறிக்கையில் குற்றவாளியின் பெயர் மற்றும் முகவரி முறையாகக் குறிப்பிடப்படாமல் ‘தெரியாத நபர்’ என விடுபட்டிருந்ததாகத் தகவல்கள் வெளியாயின. இதனால் கேரள காவல்துறை குற்றவாளியைக் காப்பாற்ற முயல்வதாகவும், வழக்கை திசைதிருப்பப் பார்ப்பதாகவும் குற்றச்சாட்டுகள் வலுத்தன. விபத்தில் சிக்கி உயிரிழந்தவர்களின் குடும்பத்தினரும் பொதுமக்களும் இதற்கு எதிராகக் கடுமையான கண்டனங்களைப் பதிவு செய்ததோடு, சம்பந்தப்பட்ட அனைவரும் சட்டத்தின் முன் நிறுத்தப்பட வேண்டும் எனத் தீவிரமாக வலியுறுத்தி வருகின்றனர்.

இதற்கிடையே, சமூக வலைத்தளங்களில் பரவிய அந்த காரின் பழைய வீடியோக்களில், கார் மணிக்கு 120 கி.மீ வேகத்திற்கும் அதிகமாக இயக்கப்பட்டது தெரியவந்துள்ளது. மேலும், சட்டப்பூர்வ வயது வரம்பை மீறி அந்த இளைஞருக்கு மது வழங்கிய பார்கள் மீதும், இந்த விவகாரத்தில் காவல்துறையினர் கையாண்ட விதம் குறித்தும் விரிவான விசாரணைகள் நடத்தப்பட்டு வருகின்றன. இந்தச் சம்பவம் கேரளாவில் பெரும் அதிர்வுகளையும், சாலைப் பாதுகாப்பு குறித்த விவாதங்களையும் மீண்டும் ஏற்படுத்தியுள்ளது.