“என் பையனை கொன்னுட்டாங்க சார்…” கதறி அழுத தந்தை..! 5 நாட்களாகத் தேடப்பட்ட 10-ஆம் வகுப்பு மாணவன் குளத்தில் சடலமாக மீட்பு.. விசாரணையில் சிக்கிய அந்த ஒரு போன் கால்..!!

உத்தரப் பிரதேச மாநிலம் கோரக்பூரில் 5 நாட்களாகக் காணாமல் போயிருந்த 10-ஆம் வகுப்பு டாப்பர் மாணவன் பிரின்ஸ் நிஷாத் (15), சிலுவாதால் குளத்தில் பிணமாகக் கண்டெடுக்கப்பட்டுள்ளார். கடந்த செப்டம்பர் 23 அன்று காலையில் பயிற்சி மையத்திற்குச் செல்வதாகக் கூறி வீட்டை விட்டு வெளியேறிய பிரின்ஸ், அதன் பிறகு வீடு திரும்பவில்லை. அவரது குடும்பத்தினர் அளித்த புகாரின் பேரில் வழக்குப் பதிவு செய்த காவல்துறை, செல்போன் அழைப்பு விவரங்கள் மற்றும் இருப்பிடத்தைக் கொண்டு விசாரணையைத் தொடங்கியது. பிரின்ஸின் கடைசி மொபைல் லொகேஷன் பிபிகஞ்ச் பகுதியில் காட்டிய நிலையில், திங்கள்கிழமை மாலையில் சிலுவாதால் குளத்தில் மிதந்த அவரது உடலைக் கைப்பற்றி பிரேதப் பரிசோதனைக்காக BRD மருத்துவக் கல்லூரிக்கு அனுப்பி வைத்தனர்.

மாணவனின் மரணச் செய்தி அறிந்ததும் அதிர்ச்சியடைந்த குடும்பத்தினர், பிரேதப் பரிசோதனைக்கூடத்தின் முன் கூடி இது தற்கொலை அல்ல, கொலை என்று குற்றம் சாட்டி சுமார் ஒரு மணி நேரம் போராட்டத்தில் ஈடுபட்டனர். காவல் துறையினர் உரிய நடவடிக்கை எடுக்கப்படும் என உறுதியளித்த பிறகே குடும்பத்தினர் அமைதியடைந்தனர். பிரின்ஸின் தந்தை கூறுகையில், தனது மகன் ஒரு பெண்ணுடன் தொலைபேசியில் பேசி வந்ததாகவும், அந்த காதல் விவகாரம் காரணமாகவே தனது மகனைக் கடத்தி கொலை செய்து உடலைக் குளத்தில் வீசியிருப்பதாகச் சந்தேகத்தின் பேரில் குற்றம் சாட்டியுள்ளார்.

இச்சம்பவம் குறித்து சிலுவாதால் காவல் நிலைய அதிகாரி சூரஜ் சிங் தெரிவிக்கையில், முதற்கட்ட விசாரணையில் இது காதல் விவகாரம் தொடர்பானது போலத் தெரிவதாகக் கூறியுள்ளார். இந்த சந்தேகத்தின் அடிப்படையில் அந்தப் பெண் மற்றும் அவரது பெற்றோரை விசாரணைக்காகக் காவல்துறையினர் காவலில் எடுத்துள்ளனர். மேலும் அந்தப் பெண்ணின் செல்போன் உரையாடல்களும் ஆய்வு செய்யப்பட்டு வருகின்றன. பிரேதப் பரிசோதனை அறிக்கை வந்த பிறகே மாணவனின் இறப்பிற்கான சரியான காரணம் தெரியவரும் என்றும், அதன் அடிப்படையில் அடுத்தகட்ட நடவடிக்கை எடுக்கப்படும் என்றும் காவல்துறை தெரிவித்துள்ளது.