“தலை புண்ணில் நெளிந்த புழுக்கள்” ICU-வில் சிகிச்சைக்காக இருந்த பெண்ணுக்கு நேர்ந்த கொடூரம்… மருத்துவர்களின் அலட்சியத்தால் கவலைக்கிடம்..!!

கர்நாடக மாநிலம் ராய்ச்சூரில் உள்ள அரசு ஓபெக் மருத்துவமனையில் சிகிச்சை பெற்று வந்த பெண் ஒருவரின் தலையில் புழுக்கள் கண்டெடுக்கப்பட்ட அதிர்ச்சியூட்டும் சம்பவம் பெரும் பரபரப்பை ஏற்படுத்தியுள்ளது. யாத்கிரி பகுதியைச் சேர்ந்த மகேஸ்வரி (30) என்ற பெண், கடந்த அக்டோபர் 9ஆம் தேதி நேரிட்ட சாலை விபத்தில் படுகாயமடைந்து இந்த மருத்துவமனையின் தீவிர சிகிச்சைப் பிரிவில் அனுமதிக்கப்பட்டார்.

மருத்துவமனை ஊழியர்கள் மற்றும் மருத்துவர்களின் அலட்சியத்தால் கடந்த மூன்று நாட்களாக அவருக்கு முறையான சிகிச்சை அளிக்கப்படவில்லை என அவரது குடும்பத்தினர் குற்றம் சாட்டியுள்ளனர். வெள்ளிக்கிழமை இரவு அங்குள்ள ஊழியர்கள் அவரது காயத்திற்குச் சரியாகக் கட்டுப் போடாததால், ஸ்கேனிங் பரிசோதனை செய்தபோது அவரது தலையில் இருந்த காயத்திலிருந்து புழுக்கள் வெளியேறியதைக் கண்டு குடும்பத்தினர் அதிர்ச்சியடைந்தனர். நிபுணத்துவ மருத்துவர்கள் விடுமுறையில் இருப்பதாகக் கூறி ஊழியர்கள் நேரத்தை வீணடித்ததாகவும், தற்போது மகேஸ்வரியின் நிலை கவலைக்கிடமாக உள்ளதாகவும் கூறப்படுகிறது.

மேலும், அந்த மருத்துவமனையின் தீவிர சிகிச்சைப் பிரிவில் மின்விசிறிகள் கூட இல்லாததால், நோயாளிகளின் உறவினர்கள் கைக் விசிறிகளைப் பயன்படுத்தி விசிறி விடும் அவல நிலை உள்ளதாகக் குடும்பத்தினர் வேதனை தெரிவித்துள்ளனர். இந்த விவகாரத்தில் மாவட்ட நிர்வாகமும், சுகாதாரத் துறையும் உடனடியாகத் தலையிட்டு, கடமையில் அலட்சியமாக இருந்த மருத்துவர்கள் மற்றும் ஊழியர்கள் மீது கடுமையான நடவடிக்கை எடுக்க வேண்டும் என்றும், நோயாளிகளுக்குச் சிறந்த சிகிச்சை வழங்க வேண்டும் என்றும் கோரிக்கை விடுக்கப்பட்டுள்ளது.