திமுக-வில் வெடித்த அதிருப்தி பாம்.. தவெக-வில் இணைய அனிதா ராதாகிருஷ்ணன் ஸ்கெட்ச்..? தூக்கத்தை இழந்த அறிவாலயம்..!!

தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ள தகவலின்படி, திமுகவின் மூத்த நிர்வாகியும் அமைச்சருமான அனிதா ராதாகிருஷ்ணன் தமிழக வெற்றிக் கழகத்தில் இணையத் திட்டமிட்டு வருவதாகக் கூறப்படுகிறது. திமுகவில் மாவட்டச் செயலாளர்களுக்கான வயது வரம்பு 70 ஆக நிர்ணயம் செய்யப்பட்டுள்ளதால், அனிதா ராதாகிருஷ்ணன் தனது கட்சிப் பதவியை இழக்கும் இக்கட்டான சூழ்நிலை உருவாகியுள்ளது. இந்த விவகாரத்தால் கட்சித் தலைமை மீது ஏற்பட்டுள்ள கடும் அதிருப்தி காரணமாக, அவர் விஜய் தலைமையிலான தவெக பக்கம் சாயத் தயாராகி வருவதாகத் தெரிகிறது. இதன் முன்னோட்டமாகவே, அனிதா ராதாகிருஷ்ணனின் தீவிர ஆதரவாளரான பில்லா ஜெகன் சமீபத்தில் தவெகவில் இணைந்துள்ளார் என்பது இந்தத் தகவலுக்கு மேலும் வலுசேர்த்துள்ளது.

முன்னதாக தவெக தலைவர் விஜய்யை அனிதா ராதாகிருஷ்ணன் மேடைகளில் மிகக் கடுமையாக விமர்சித்து வந்த நிலையில், தற்போதைய அரசியல் மாற்றங்களுக்குப் பிறகு அவர் முழு அமைதி காத்து வருவது அரசியல் வட்டாரத்தில் உற்று நோக்கப்படும் ஒரு முக்கிய நகர்வாக மாறியுள்ளது. மாவட்டச் செயலாளர் பதவி பறிபோகும் பட்சத்தில், தென் மாவட்டங்களில் தனது அரசியல் செல்வாக்கைத் தக்கவைத்துக் கொள்ள அவர் இந்த அதிரடி முடிவை எடுக்க வாய்ப்புள்ளதாகத் தகவல்கள் தெரிவிக்கின்றன. இருப்பினும், தவெகவில் இணைவது குறித்த அதிகாரப்பூர்வமான அறிவிப்புகள் ஏதும் இதுவரை அவரிடமிருந்து வெளியாகவில்லை.