சொந்தபந்தமெல்லாம் சும்மாங்க..! “உனக்கெல்லாம் இனி வேலை இல்லை” அன்று அவமானப்படுத்திய உறவினர்.. இன்று மாதம் ரூ.1.3 லட்சம் சம்பாதித்து கெத்து காட்டும் உபெர் டிரைவர்..!!

ஒரு மனிதன் திடீரென மோசமான சூழ்நிலையை எதிர்கொள்ளும்போது, முதலில் அவனைக் கைவிடுவது அவனது சொந்த பந்தங்களாகத்தான் இருக்கும். ஆனால், அதே சூழ்நிலை ஒருவனின் சுயமரியாதையை உலுக்கினால், அவன் எதையும் சாதிக்கும் வலிமையைப் பெற்றுவிடுகிறான் என்பதற்குச் சான்றாக இந்த உபெர் பைக் ஓட்டுநரின் கதை அமைந்துள்ளது. பீகாரைச் சேர்ந்த இவர், நொய்டாவில் உள்ள தனது சொந்தக்காரரின் தொழிற்சாலையில் வேலை பார்த்து வந்தபோது திடீரென மாரடைப்பால் பாதிக்கப்பட்டார். அவர் குணமடைந்து வந்த நிலையில், “உன்னால் இனி கனமான பொருட்களைத் தூக்க முடியாது, நீ வேலைக்குத் தகுதியில்லாதவன்” எனக் கூறி, மருத்துவச் செலவுகளுடனும் பணத்தேவையுடனும் தவித்த அவரை அந்த உறவினரே வேலையை விட்டுத் தூக்கினார்.

சொந்த உறவின் இந்தத் துரோகமும் அவமானமும் அவரை முடக்கிவிடவில்லை; மாறாக, தன் உழைப்பின் மூலம் பதிலடி கொடுக்க விரும்பினார். அவருக்கு உறுதுணையாக நின்ற அவரது மனைவி, முதலில் ஒரு வாடகை ஸ்கூட்டரை எடுத்துக் கொடுத்தார். அதன் மூலம் இரண்டு மாதங்கள் டெல்லி முழுவதையும் சுற்றிப் பார்த்து வழிகளைத் தெரிந்து கொண்டவர், பின்னர் மனைவி வாங்கித் தந்த புதிய பைக் மூலம் உபெர் ஓட்டுநராகத் தன் பயணத்தைத் தொடங்கினார். தற்போது நாள்தோறும் காலை 10 மணி முதல் இரவு 10 மணி வரை உழைத்து, மாதம் ₹50,000-க்கும் அதிகமாக அவர் சம்பாதித்து வருகிறார்.

இந்தக் கதையின் சுவாரசியமான திருப்பமே, அவர் வறுமைக்காக இந்த வேலையைச் செய்யவில்லை என்பதுதான். நொய்டா எலக்ட்ரானிக் சிட்டி பகுதியில் தலா ₹80 லட்சம் மதிப்புள்ள இரண்டு சொந்த பிளாட்கள் அவருக்கு உள்ளன. அதன் மூலம் மட்டுமே அவருக்கு மாதந்தோறும் ₹80,000 வாடகையாகக் கிடைக்கிறது. “நான் வீட்டில் சும்மா உட்கார விரும்பவில்லை, என்னை அசிங்கப்படுத்தியவருக்கு நான் வீணாய்ப் போகவில்லை என்பதைக் காட்டவே உழைக்கிறேன்” எனப் பிரபல உள்ளடக்க உருவாக்குநரான ஆஸ்தா சேத்திடம் அவர் பெருமிதத்துடன் பகிர்ந்துள்ளார்.

மேலும், தனக்கு இரண்டு மகள்கள் இருப்பதாகவும், ஆண் வாரிசு மீது ஆசையில்லை என்றும் கூறும் அவர், மகள்களின் திருமணத்திற்காக அந்த பிளாட்களை விற்றுச் சிறப்பாக நடத்தி முடிப்பேன் எனக் கூறியுள்ளார். எந்தவொரு ஆடம்பரமும் பந்தாவும் இல்லாமல், மிகச் சாதாரணமாக அவர் பேசிய இந்த வீடியோ சமூக வலைத்தளங்களில் வைரலாகி, லட்சக்கணக்கானோரின் பாராட்டுகளையும் வியப்பையும் பெற்று வருகிறது.