“விஜய் என்ற ஒற்றை மனிதருக்காக…!விஜய் அண்ணா ஸ்க்ரீனில் அழுதால் நிஜமாகவே அழுதுவிடுவேன்…! கண்கலங்க வைத்த நடிகர் ஜெய்யின் உருக்கமான பேட்டி…!

தமிழக அரசியல் வரலாற்றில் பல தசாப்தங்களாக நிலவி வந்த சில அரசியல் கணக்குகளையும், மரபுகளையும் உடைத்தெறிந்து, நடிகர் விஜய் (தவெக தலைவர்) தமிழ்நாட்டின் புதிய முதலமைச்சராகப் பொறுப்பேற்றுள்ளதை அவரது ரசிகர்களும், தொண்டர்களும் இன்னமும் விமரிசையாகக் கொண்டாடி வருகிறார்கள். திரையுலகில் இருந்து வந்து தமிழகத்தை ஆட்சி செய்தவர்களில் எம்.ஜி.ஆர், ஜெயலலிதா ஆகியோரே இறுதியானவர்கள் என்று அரசியல் விமர்சகர்கள் கணித்திருந்த வேளையில், தவெக தலைவர் விஜய் 108 தொகுதிகளில் ‘கில்லி’ தனமாக வெற்றி பெற்று சாதனை படைத்துள்ளார். பல தொகுதிகளில் வேட்பாளர்களின் முகம் கூடத் தெரியாத நிலையிலும், ‘விசில்’ சின்னம் மற்றும் ‘விஜய்’ என்ற இரண்டு பிம்பங்களுக்காக மட்டுமே மக்கள் வாரி வழங்கி வாக்களித்த சம்பவங்கள் அரசியல் களத்தையே உலுக்கியுள்ளன.

இந்த அரசியல் மாற்றத்திற்கு ஒட்டுமொத்த கோலிவுட் திரையுலகமும் சத்தமில்லாமல் தங்களது பேராதரவை வழங்கியுள்ளது. தமிழ் சினிமாவின் முன்னணி நட்சத்திரங்கள் பலர் தங்களது ஆதரவை வெளிப்படையாகக் காட்டாத போதும், தேர்தல் நாளன்று ‘விசில்’ சின்னத்திற்குப் பின்னால் நின்றதாகக் கூறப்படுகிறது. குறிப்பாக, விஜய்யின் இந்த வரலாற்றுச் சிறப்புமிக்க வெற்றியைத் தட்டக் கொண்டாடுவதற்காக நடிகர் சிம்பு தனது ‘அரசன்’ படப்பிடிப்பில் இருந்தே தற்காலிகமாகப் பிரேக் எடுத்துள்ளார் என்ற சுவாரசியமான தகவலும் வெளியாகியுள்ளது. அதேபோல, நடிகர் சமுத்திரக்கனி உள்ளிட்ட திரையுலகப் பிரபலங்கள் பலரும் விஜய்யின் இந்த புதிய அரசியல் பயணத்தின் ஒவ்வொரு அசைவையும் மிகுந்த அக்கறையுடன் கவனித்து வாழ்த்தி வருகின்றனர்.

திரையுலகில் விஜய்க்கு கிடைத்த ஆரம்பகால மற்றும் தீவிரமான ஆதரவுகளில் நடிகர் ஜெய்யின் பங்களிப்பு மிக முக்கியமானது. ‘சுப்ரமணியபுரம்’ உள்ளிட்ட பல ஹிட் படங்களில் நாயகனாக நடித்த ஜெய், தனது திரைப்பயணத்தின் ஆரம்பத்தில் ‘பகவதி’ திரைப்படத்தில் விஜய்யின் தம்பியாக நடித்துதான் கவனத்தைப் பெற்றார். விஜய் மீது எப்போதுமே தீராத பாசமும், மரியாதையும் கொண்டிருக்கும் ஜெய், நடந்து முடிந்த சட்டமன்றத் தேர்தலில் எந்தவித அரசியல் பயமுமின்றி வேளச்சேரி தொகுதி தவெக வேட்பாளரை ஆதரித்துத் தீவிரத் தேர்தல் பரப்புரையில் ஈடுபட்டார். இத்தகைய துணிச்சலான முடிவு அவரது திரை வாழ்க்கைக்குப் பாதிப்பை ஏற்படுத்தலாம் என அவரது நலம் விரும்பிகள் அஞ்சிய போதும், விஜய் என்ற ஒற்றை மனிதருக்காக அவர் களத்தில் நின்றார்.

தற்போது தனது ‘விஜய் அண்ணா’ முதலமைச்சராக அரியணை ஏறியுள்ளதை மிகுந்த மகிழ்ச்சியுடன் கொண்டாடி வரும் ஜெய், தனியார் ஊடகம் ஒன்றுக்கு அளித்துள்ள பேட்டி சமூக வலைத்தளங்களில் வைரலாகி வருகிறது. அந்தப் பேட்டியில் பேசிய ஜெய், “விஜய் அண்ணா, ரஜினி சார் அல்லது கார்த்திக் சார் ஆகியோரின் மேனரிசங்களைப் பின்பற்றுவதாகப் பலரும் கூறுவதுண்டு; கூர்ந்து கவனித்தால் அதில் கார்த்திக் சாரின் சாயல் அதிகம் இருக்கும். விஜய் அண்ணா திரையில் அழுதால் கூட என்னால் தாங்க முடியாது, நிஜத்திலேயே அழுதுவிடுவேன். இந்த சினிமாவும், வாழ்க்கையும் எனக்கு அவரால்தான் கிடைத்தது. அவருக்கு ஆதரவு தருவதால் எனது இந்த வாழ்க்கையே போகும் என்றாலும், அதை இழக்க நான் தயாராக இருக்கிறேன்; எனக்கு எந்தக் கவலையும் இல்லை” என உருக்கமாகப் பேசி அண்ணன்-தம்பி பாசத்தை வெளிப்படுத்தியுள்ளார்.