புற்றுநோய் சிகிச்சையில் இருந்தபோது கௌதமிக்கு நடந்த துரோகம்…25 கோடி ரூபாய் மோசடி…”6 இடங்களில் ஒரே நேரத்தில் நுழைந்த அதிகாரிகள்…சட்டவிரோத பணப்பரிமாற்றம் உண்மை தான்… அழகப்பனை வளைத்துப் பிடித்த அமலாக்கத் துறை…!

தமிழ் திரையுலகின் முன்னணி நடிகையான கௌதமியின் 25 கோடி ரூபாய் சொத்து மோசடி வழக்கில், தற்போது அமலாக்கத் துறை (ED) அதிரடியாகக் களமிறங்கியுள்ளது பெரும் பரபரப்பை ஏற்படுத்தியுள்ளது. தமிழ், தெலுங்கு, மலையாளம் எனப் பல மொழிகளில் முன்னணி நட்சத்திரமாக வலம் வந்த கௌதமி, கடந்த 2004-ஆம் ஆண்டு புற்றுநோயால் பாதிக்கப்பட்டு சிகிச்சை பெற்று வந்தார். அந்த இக்கட்டான காலகட்டத்தைப் பயன்படுத்திக் கொண்ட அழகப்பன் என்பவர், போலி ஆவணங்களைத் தயாரித்துத் தனது 25 கோடி ரூபாய் மதிப்பிலான சொத்துக்களை மோசடி செய்துவிட்டதாகக் கௌதமி புகார் அளித்திருந்தார். இந்த விவகாரத்தில் குற்றம் சாட்டப்பட்ட அழகப்பனுக்கு அப்போதைய பாஜகவின் சில மூத்த நிர்வாகிகள் ஆதரவாகச் செயல்பட்டதால், காவல் துறை நடவடிக்கை எடுக்கத் தாமதமானதாகக் கூறப்பட்டது.

தமக்கு நேர்ந்த இந்த அநீதியால் மிகுந்த வேதனையடைந்த நடிகை கௌதமி, கடந்த 25 ஆண்டுகாலத் தனது அரசியல் உழைப்புக்குக் கட்சி துணையாக நிற்காமல் ஏமாற்றியவனுக்கே ஆதரவு தருகிறது என்று பகிரங்கமாகக் குற்றம் சாட்டி, 2023 அக்டோபரில் பாரதிய ஜனதா கட்சியிலிருந்து அதிரடியாக விலகினார். அவரது இந்த விலகல் அப்போது தமிழக அரசியல் மற்றும் சினிமா வட்டாரத்தில் பெரும் புயலைக் கிளப்பியது. அதன் தொடர்ச்சியாகக் கௌதமி அளித்த புகாரின் பேரில், சென்னை மத்திய குற்றப்பிரிவு காவல் துறையினர் தீவிர விசாரணை நடத்தி அழகப்பன், நாச்சியாள், அவரது மகன் சிவா, மருமகள் ஆர்த்தி, அழகப்பனின் சகோதரர் பாஸ்கர் மற்றும் ஓட்டுநர் சதீஷ்குமார் ஆகிய 6 பேரைக் கைது செய்து சிறையில் அடைத்தனர்.

இந்நிலையில், இந்த 25 கோடி ரூபாய் சொத்து மோசடி விவகாரத்தில் பெரிய அளவில் சட்டவிரோதப் பணப்பரிமாற்றம் (Money Laundering) நடந்துள்ளதை அமலாக்கத் துறையினர் தற்போது உறுதி செய்துள்ளனர். இதன் அடிப்படையில், குற்றம் சாட்டப்பட்ட அழகப்பனுக்குச் சொந்தமான சென்னை, மதுரை உள்ளிட்ட ஆறு முக்கிய இடங்களில் இன்று காலை முதலே அமலாக்கத் துறை அதிகாரிகள் அதிரடிச் சோதனையில் ஈடுபட்டு வருகின்றனர். இந்தச் சோதனையின் முடிவில் கைப்பற்றப்படும் ஆவணங்கள் மற்றும் சொத்து விபரங்கள் குறித்த முழுமையான தகவல்கள் வெளியாகும் என்று எதிர்பார்க்கப்படும் நிலையில், இந்த இ.டி சோதனை கோலிவுட் மற்றும் அரசியல் வட்டாரத்தில் மீண்டும் அதிர்வலைகளை உருவாக்கியுள்ளது.