எங்களுக்குள்ள சண்டையா..? “ALL THE BEST” ஒரே போஸ்டில் ஊடகங்களின் வாயை அடைத்த அமைச்சர்கள் கீர்த்தனா – ஜெகதீஸ்வரி..!!

விருதுநகர் மாவட்டத்தைச் சேர்ந்த முன்னணி பெண் அமைச்சர்களான ஜெகதீஸ்வரி (சமூக நலன் மற்றும் மகளிர் உரிமைத்துறை) மற்றும் கீர்த்தனா (தொழில்துறை) ஆகிய இருவருக்கும் இடையே அதிகாரப் போட்டி நிலவுவதாக அண்மையில் ஊடகங்களில் வெளியான செய்திகள் அரசியல் வட்டாரத்தில் பெரும் பரபரப்பை ஏற்படுத்தின. கடந்த ஜூன் 26 அன்று விருதுநகரில் நடைபெற்ற அரசு விழா ஒன்றில், மேடைப் பதாகையில் புரோட்டகால் முறைப்படி மாவட்டப் பொறுப்பு அமைச்சர் ஜெகதீஸ்வரியின் பெயர் முதலில் இடம்பெறாமல், அமைச்சர் கீர்த்தனாவின் பெயர் முதலாவதாக அச்சிடப்பட்டிருந்தது. இதனால் அதிருப்தியடைந்த அமைச்சர் ஜெகதீஸ்வரி, மேடையிலேயே மாவட்ட ஆட்சியரிடம் “புரோட்டகால் தெரியாதா?” எனக் கடிந்து கொண்ட வீடியோ சமூக ஊடகங்களில் பரவியதால், இருவருக்கும் இடையே மனக்கசப்பு இருப்பதாக ஊடகங்களால் சித்தரிக்கப்பட்டது.

இந்த ஊடகக் கட்டுக்கதைகளுக்கும் வதந்திகளுக்கும் முற்றுப்புள்ளி வைக்கும் விதமாக, அமைச்சர்கள் கீர்த்தனாவும் ஜெகதீஸ்வரியும் இணைந்து தங்களது அதிகாரப்பூர்வப் பக்கத்தில் ஒரு ‘செல்ஃபி’ புகைப்படத்தைப் பகிர்ந்துள்ளனர். அத்துடன், “அடுத்த கட்டுக்கதையிலாவது நல்ல அதிர்ஷ்டம் அமையட்டும்” என்று அமைச்சர் கீர்த்தனா பதிவிட்டு, தங்களுக்குள் எந்தப் பிரச்சனையும் இல்லை என்பதையும், தாங்கள் என்றும் நல்ல தோழிகள் என்பதையும் நாசூக்காக உணர்த்தியுள்ளார். தமிழக முதல்வர் விஜய் தலைமையிலான தவெக அரசு, அமைச்சர்களுக்குள் எழுந்த இந்த சர்ச்சையை எவ்வித சலனமுமின்றி மிகவும் சுமுகமாக முடித்து வைத்துள்ளது.

இருப்பினும், இந்த விவகாரம் தவெக ஆதரவாளர்கள் மற்றும் பொதுமக்களிடையே சில விவாதங்களை எழுப்பத் தவறவில்லை. தமிழக முதல்வர் விஜய் தலைமையிலான அரசில் இடம்பெற்றுள்ள அமைச்சர்களும், சட்டமன்ற உறுப்பினர்களும் பொதுவெளியில் பேசும் போதும், அரசு அதிகாரிகளிடம் தங்களது கருத்துக்களைத் தெரிவிக்கும் போதும் இன்னும் கூடுதல் கவனத்துடனும், கண்ணியத்துடனும் நடந்து கொள்ள வேண்டும் என்பதே நடுநிலையாளர்கள் மற்றும் பொதுமக்களின் எதிர்பார்ப்பாக உள்ளது.