ரயில்வே கேட் அருகே அலறிய மக்கள்.. ஓடும் ரயிலில் சிக்கி உடல் நசுங்கிய தாய், குழந்தைகள்.. தண்டவாளத்தில் உறைந்த மரண பயங்கரம்..!!

ஆந்திர மாநிலம் அனந்தபூர் மாவட்டத்தில் உள்ள யாடிகி மண்டலம் வேமுலபாடு ரயில்வே கேட் அருகே ஓடும் ரயிலில் அடிபட்டு தாயும் அவரது இரு குழந்தைகளும் பரிதாபமாக உயிரிழந்த கொடூரச் சம்பவம் அப்பகுதியில் பெரும் சோகத்தை ஏற்படுத்தியுள்ளது. விபத்தில் உயிரிழந்த பெண்ணிற்கு சுமார் 35 வயது இருக்கும் என்றும், அவரது குழந்தைகளுக்கு முறையே 8 மற்றும் 10 வயது இருக்கும் என்றும் முதற்கட்ட தகவல்கள் தெரிவிக்கின்றன. எதிர்பாராத விதமாக ரயிலின் அடியில் சிக்கிய இந்த விபத்தில், அந்தத் தாயும் ஒரு குழந்தையும் சம்பவ இடத்திலேயே உடல் நசுங்கி பரிதாபமாக உயிரிழந்தனர்.

விபத்தில் சிக்கி உயிருக்கு ஆபத்தான நிலையில் படுகாயமடைந்த மற்றொரு குழந்தை, அங்கிருந்தவர்களால் மீட்கப்பட்டு ராயல் செருவு ஆரம்ப சுகாதார நிலையத்திற்கு அவசரமாகக் கொண்டு செல்லப்பட்டது. எனினும், அங்கு தீவிர சிகிச்சை அளிக்கப்பட்ட போதிலும் பலனின்றி அந்தச் சிறுமியும் பரிதாபமாக உயிரிழந்தார். ஒரே குடும்பத்தைச் சேர்ந்த தாய் மற்றும் இரு குழந்தைகள் என மூன்று பேர் அடுத்தடுத்து ரயிலில் அடிபட்டு உயிரிழந்த இந்த விபரீதச் சம்பவம் வேமுலபாடு பகுதியில் ஒட்டுமொத்த பொதுமக்களையும் ஆழ்ந்த துயரத்திலும் அதிர்ச்சியிலும் ஆழ்த்தியுள்ளது.