திக் திக்..! வானில் பறந்த விமானத்தில் திடீர் பீதி..! எமர்ஜென்சி கதவைத் திறக்க முயன்ற பயணி.. கொச்சி விமான நிலையத்தில் கைது செய்யப்பட்ட பகீர் சம்பவம்..!!

மலேசியாவின் கோலாலம்பூரிலிருந்து கொச்சிக்குச் சென்ற படிக் ஏர் விமானம் தரையிறங்குவதற்குச் சில நிமிடங்களுக்கு முன்பு, கேரளாவைச் சேர்ந்த பயணி ஒருவர் அவசரகால கதவைத் திறக்க முயன்ற சம்பவம் சக பயணிகளிடையே பெரும் பீதியை ஏற்படுத்தியது. இச்சம்பவத்தில் ஈடுபட்டவர் கேரளாவின் பாலக்காடு மாவட்டம், கூட்டநாடு பகுதியைச் சேர்ந்த 34 வயதான ஜம்ஷீர் அதானிக்கல் என அடையாளம் காணப்பட்டுள்ளார். அவசரகால வெளியேறும் வழியின் அருகே இருந்த ஜன்னல் இருக்கையில் அமர்ந்திருந்த இவர், விமானம் கொச்சியை நோக்கி இறங்கத் தொடங்கியபோது திடீரென எழுந்து அவசரகால கதவைத் திறக்க முயன்றுள்ளார்.

அவரைத் தடுக்க முயன்ற விமானப் பணியாளர்களையும் சக பயணிகளையும் அவர் மிரட்டியதாகக் கூறப்படுகிறது. எனினும், நிலைமையைச் சமாளித்த பயணிகள் மற்றும் பணியாளர்கள் அவரை உடனடியாக மடக்கிப் பிடித்துக் கட்டுப்படுத்தினர். அதன் பின்னர், இரவு 11.30 மணியளவில் விமானம் கொச்சி சர்வதேச விமான நிலையத்தில் பாதுகாப்பாகத் தரையிறங்கியது. விமானம் தரையிறங்கியதும் சிஐஎஸ்எஃப் படையினர் அவரை உடனடியாகக் கைது செய்து, பின்னர் மேலதிக விசாரணைக்காக நெடும்பாசேரி காவல்துறையிடம் ஒப்படைத்தனர்.

படிக் ஏர் நிறுவனத்தின் பாதுகாப்புக் குழு அளித்த புகாரின் அடிப்படையில், விமானத்தைச் சேதப்படுத்த முயன்றது, குற்றவியல் மிரட்டல் மற்றும் சட்டப்பூர்வ உத்தரவுகளுக்குக் கீழ்ப்படியத் தவறியது ஆகிய பிரிவுகளின் கீழ் காவல்துறை வழக்குப்பதிவு செய்துள்ளது. முதல் தகவல் அறிக்கை பதிவு செய்யப்பட்டுள்ள போதிலும், பயங்கரவாதம் அல்லது பாதுகாப்புக்கு எதிரான சட்டவிரோதச் செயல்கள் தொடர்பான கடுமையான பிரிவுகள் இதுவரை சேர்க்கப்படவில்லை. இச்சம்பவத்திற்கான பின்னணி மற்றும் நோக்கம் குறித்து காவல்துறையினர் தொடர்ந்து விசாரணை நடத்தி வருகின்றனர்.