ஆபாச ஆப்ஸ்களுக்கு செக்..! 2 ஆண்டுகளில் 50 OTT தளங்களை அதிரடியாக முடக்கிய மத்திய அரசு..!!

பல்வேறு சட்டங்களை மீறி ஆபாசமான மற்றும் பாலியல் ரீதியான உள்ளடக்கங்களை ஒளிபரப்பிய காரணத்தால், கடந்த இரண்டு ஆண்டுகளில் 50 ஓடிடி ஸ்ட்ரீமிங் தளங்களை மத்திய அரசு முடக்கியுள்ளது. நாசிக் நாடாளுமன்ற உறுப்பினர் ராஜபாவு பராக் பிரகாஷ் வாஜே மக்களவையில் எழுப்பிய கேள்விக்கு எழுத்துப்பூர்வமாக பதிலளித்த தகவல், ஒளிபரப்பு மற்றும் நாடாளுமன்ற விவகாரங்கள் துறை இணை அமைச்சர் டாக்டர் எல். முருகன் இத்தகவலை வெளியிட்டார். டிஜிட்டல் தளங்களுக்கு எதிராகப் பெறப்பட்ட புகார்களின் அடிப்படையில் இந்த நடவடிக்கை எடுக்கப்பட்டுள்ளது.

மின்னணு வடிவில் ஆபாசமான மற்றும் பாலியல் ரீதியான உள்ளடக்கங்களை பரப்புவது தொடர்பான தகவல் தொழில்நுட்பச் சட்டம் 2000-இன் 67 மற்றும் 67A பிரிவுகளை இந்த தளங்கள் மீறியுள்ளது கண்டறியப்பட்டது. மேலும், ஆபாச செயல்கள் தொடர்பான பாரதிய நியாய சம்ஹிதா சட்டத்தின் 294-வது பிரிவு மற்றும் பெண்களை அநாகரிகமாக சித்தரிப்பதை தடுக்கும் சட்டம் 1986-இன் 4-வது பிரிவு ஆகியவற்றையும் இத்தளங்கள் மீறியுள்ளன. சட்டவிரோத உள்ளடக்கங்களைப் பரப்பும் தளங்களுக்கு எதிராக நடவடிக்கை எடுக்க இந்த சட்ட விதிகளே அதிகாரிகளுக்கு அதிகாரம் அளிக்கின்றன.

டிஜிட்டல் உள்ளடக்கங்கள் தொடர்பாக வரும் புகார்களைத் தொடர்ந்து ஆய்வு செய்து, விதிமீறல்கள் கண்டறியப்படும் இடங்களில் தகுந்த நடவடிக்கை எடுக்கப்படுவதாக மத்திய அரசு தெரிவித்துள்ளது. தகவல் தொழில்நுட்பச் சட்டத்தின் பிரிவு 79(3)(b)-இன் கீழ், உரிய அரசு அதிகாரி அறிவித்த பிறகு, சட்டவிரோத உள்ளடக்கங்களை அகற்றவோ அல்லது பொதுமக்களின் அணுகலை முடக்கவோ இடைத்தரகர்களுக்கு உத்தரவிடப்படுகிறது. இந்தியாவின் டிஜிட்டல் சூழலில் பாதுகாப்பு மற்றும் சட்ட இணக்கத்தை உறுதி செய்ய இத்தகைய கட்டுப்பாடுகள் தொடர்ந்து அமல்படுத்தப்பட்டு வருகின்றன.