உச்சக்கட்ட கொடூரம்.. முன்னாள் மனைவியைத் துண்டு துண்டாக வெட்டி சூப் சமைத்த கணவன்.. நெஞ்சை உலுக்கும் பின்னணி..!

ஹாங்காங் மாடல் அபே சோய் கொலை வழக்கில், சொத்து தகராறு மற்றும் பொறாமை காரணமாக அவரது முன்னாள் கணவர் குடும்பத்தினரால் அவர் திட்டமிட்டு படுகொலை செய்யப்பட்டதாக ஹாங்காங் உயர் நீதிமன்றத்தில் அரசுத் தரப்பு விரிவான ஆதாரங்களை முன்வைத்துள்ளது. கடந்த 2023 பிப்ரவரியில் நடந்த இந்த கொடூர சம்பவத்தில், 28 வயதான அபேயின் உடல் துண்டுகளாக்கப்பட்டு, அவரது மண்டை ஓடு கேரட் மற்றும் காய்கறிகள் கலந்த சூப் பானையிலும், கால்கள் குளிர்சாதனப் பெட்டியிலும் கண்டெடுக்கப்பட்டன. அபேயின் முன்னாள் மாமனார் குவாங் காவ் பெயரில் வாங்கப்பட்ட சொகுசு குடியிருப்பை அபே விற்க முயன்றதும், அவரது புதிய கணவரின் குடும்பத்தின் மீதான பொறாமையுமே இந்த கொலைக்கான முக்கிய காரணம் என்று விசாரணையில் தெரிவிக்கப்பட்டுள்ளது

இக்கொலைச் சதியில் ஈடுபட்டதாக குற்றம் சாட்டப்பட்ட அபேயின் முன்னாள் கணவர் அலெக்ஸ் குவாங், அவரது தந்தை குவாங் காவ் மற்றும் சகோதரர் ஆண்டனி குவாங் ஆகியோர் மீதான முறையான நீதிமன்ற விசாரணை 2026 செப்டம்பர் இறுதியில் தொடங்கியது. குற்றவாளிகள் தங்களை இரத்தக்கறையிலிருந்து பாதுகாத்துக் கொள்ள முகக் கவசங்கள் மற்றும் மழைக்கோட்டுகளை அணிந்து கொண்டு உடலைத் துண்டாடியதாகவும், கொலையைச் செய்வதற்கு முன்பே மின்சார ரம்பம், இறைச்சி அரைக்கும் இயந்திரம் மற்றும் சுத்தியல் ஆகியவற்றைத் திட்டமிட்டு வாங்கியுள்ளதாகவும் அரசுத் தரப்பு வழக்கறிஞர் சார்லோட் டிரேகாட் நீதிமன்றத்தில் ஆதாரங்களைச் சமர்ப்பித்துள்ளார். கைது செய்யப்பட்டபோது மூவரும் இக்கொலை குற்றச்சாட்டுகளை மறுத்திருந்தாலும், அபேயின் இரத்தக்கறை படிந்த கார் மற்றும் தை போ பகுதியில் கண்டெடுக்கப்பட்ட உடல் எச்சங்கள் மூலம் குற்றம் வலுவாக நிரூபிக்கப்பட்டு வருகிறது.

சுமார் 45 நாட்கள் நீடிக்கும் என எதிர்பார்க்கப்படும் இந்த அதிர்வலைகளை ஏற்படுத்திய வழக்கில், குற்றம் நிரூபிக்கப்பட்டால் மூவருக்கும் ஆயுள் தண்டனை விதிக்கப்பட வாய்ப்புள்ளது. இந்த வழக்கில் தொடர்புடைய முன்னாள் மாமியார் ஜெனி லி, காவல்துறை விசாரணைக்கு இடையூறு விளைவித்த குற்றத்திற்காக ஏற்கனவே 2025 அக்டோபரில் 18 மாத சிறைத்தண்டனை பெற்றுள்ளார் என்பது குறிப்பிடத்தக்கது. தப்பியோட முயன்றபோது பிடிபட்ட அலெக்ஸ் குவாங் மற்றும் அவரது சகோதரர் ஆண்டனி ஆகியோர் உடலை சட்டவிரோதமாக மறைக்க முயன்றதை ஒப்புக்கொண்ட போதிலும், கொலைக் குற்றச்சாட்டைத் தொடர்ந்து மறுத்து வருவதால், இந்த வழக்கின் இறுதித் தீர்ப்பு வரும் டிசம்பர் மாதத்திற்குள் வெளியாகும் என எதிர்பார்க்கப்படுகிறது.