“10 ரூபா கேன் ரூ.500-ஆ..?” பக்தியா..? பிசினஸா..? பிளாஸ்டிக் கேன் விலையை கேட்டு ஷாக் ஆன பக்தர்கள்… கொந்தளிக்கும் இணையவாசிகள்..!!

ஹரித்வாரில் இருந்து புனிதமான கங்கை நீரைக் கொண்டு செல்வதற்காகப் பக்தர்கள் வழக்கமாக அங்குள்ள கடைகளில் பிளாஸ்டிக் கேன்களை வாங்குவது வழக்கம். ஆனால், தற்போது கவாட் யாத்திரையின் போது இந்த கேன்களின் விலைகள் அதீதமாக உயர்த்தப்பட்டிருப்பது மக்களை மிகவும் அதிர்ச்சியடைய வைத்துள்ளது. எஸ்.கே. பிரதான் என்ற சுற்றுலாப் பயணி ஒருவர் இது தொடர்பாகப் பதிவு செய்து வெளியிட்டுள்ள வீடியோவில், ஒரு சிறிய பிளாஸ்டிக் கேனின் விலை ரூ.80 என்றும், மற்றொரு சிறிதளவு பெரிய கேனின் விலை ரூ.100 என்றும் கடைக்காரர்கள் கூறுவது பதிவாகியுள்ளது.

அந்த வீடியோவில், இவ்வளவு அதிக விலைக்குக் கேன்களை விற்கும் கடைக்காரரிடம், “இவ்வளவு பணத்தைச் சேர்த்து என்ன செய்யப் போகிறீர்கள்?” என்று கேட்டபோது, அவர் “ஃபார்ச்சூனர் கார் வாங்கப் போகிறேன்” என்று நகைச்சுவையாகப் பதிலளிக்கிறார். மேலும், அந்த கடைவீதியில் சில பெரிய கேன்களின் விலை ரூ.500 வரை விற்கப்படுவதாகவும் கூறப்படுகிறது. அதே நேரத்தில், வீடியோ எடுப்பதைக் கண்ட ஒருவர் “வீடியோ எடுப்பதால் எதுவும் மாறப்போவதில்லை, ஹரித்வாரில் இப்போது எல்லாமே மிகவும் விலையுயர்ந்ததாகிவிட்டது” என்று ஆதங்கத்துடன் கூறுகிறார்.

https://www.instagram.com/reel/DbvS0faiLy8/?utm_source=ig_web_button_share_sheet

இணையத்தில் வைரலாகி வரும் இந்த வீடியோவைப் பார்த்த நெட்டிசன்கள் பலரும் தங்களது கருத்துகளைப் பதிவிட்டு வருகின்றனர். சிலர் “இது ஆன்மீகம் அல்ல, வெறும் பிசினஸ்” என்றும், தாங்கள் முன்பு இதே கேன்களை ரூ.10 முதல் ரூ.20 வரை மட்டுமே வாங்கி இருப்பதாகக் குறிப்பிட்டுள்ளனர். மேலும் சிலர், இவ்வளவு அதிக விலை கொடுத்து கேன்களை வாங்குவதற்குப் பதிலாக சாதாரண ரூ.20 குடிநீர் பாட்டில்களிலேயே கங்கை நீரையும் அடைத்து எடுத்து வரலாம் என்றும் யோசனை தெரிவித்துள்ளனர்.