மிகவும் கடுமையாக நடந்து கொள்ள விரும்பவில்லை.. சோனம் ரகுவன்ஷி ஜாமீனுக்கு தடை விதிக்க உச்ச நீதிமன்றம் மறுப்பு..!!

மேகாலயாவிற்குத் தேனிலவு சென்றபோது, இந்தூரைச் சேர்ந்த தொழிலதிபர் ராஜா ரகுவன்ஷி என்ற தனது கணவரைத் திட்டமிட்டுக் கொலை செய்ததாக சோனம் ரகுவன்ஷி என்பவர் மீது குற்றஞ்சாட்டப்பட்டது. இந்த வழக்கில் அவரைக் கைது செய்த மேகாலயா காவல்துறை, தங்களது கைது குறிப்பாணை உள்ளிட்ட ஆவணங்களில் ஒரு பெரிய குளறுபடியைச் செய்திருந்தது. அதாவது, கொலைக்கான சட்டப் பிரிவான பாரதிய நியாய சன்ஹிதா பிரிவு 103 என்பதற்குப் பதிலாக, தட்டச்சுப் பிழையாக BNS 403 என்று பல முக்கிய ஆவணங்களில் தவறாகக் குறிப்பிட்டிருந்தது. ஒருவரைக் கைது செய்யும்போது அதற்கான சரியான காரணங்களை அவருக்குத் தெளிவாகத் தெரிவிக்க வேண்டும் என்ற அடிப்படை அரசியலமைப்பு உரிமையை சுட்டிக்காட்டி, இந்தத் தொழில்நுட்பத் தவறின் அடிப்படையில் மேகாலயா உயர் நீதிமன்றம் சோனமிற்கு அண்மையில் பிணை வழங்கியது.

இந்த பிணை உத்தரவுக்கு உடனடியாகத் தடை விதிக்கக் கோரி மேகாலயா அரசு உச்ச நீதிமன்றத்தை அணுகியது. இந்த வழக்கை விசாரித்த நீதிபதிகள் எம்.எம். சுந்தரேஷ் மற்றும் ஷீல் நாகு ஆகியோர் அடங்கிய அமர்வு, சோனம் ரகுவன்ஷியின் பிணைக்கு இடைக்காலத் தடை விதிக்க மறுத்துவிட்டது. “குற்றம் எவ்வளவு கொடூரமானதாக இருந்தாலும், ஜாமீன் என்பது பொதுவான விதி, சிறை என்பது ஒரு விதிவிலக்கு” என்று குறிப்பிட்ட நீதிபதிகள், சோனம் ஏற்கனவே சிறையிலிருந்து விடுவிக்கப்பட்டுவிட்டதால், இந்தத் தருணத்தில் நீதிமன்றம் தலையிட்டு அவரை மீண்டும் சிறைக்கு அனுப்ப விரும்பவில்லை என்று தெளிவாகக் கூறினர்.

அதே நேரத்தில், சாதாரண தட்டச்சுப் பிழையை ஒரு முக்கியக் காரணமாகக் கொண்டு உயர் நீதிமன்றம் பிணை வழங்கிய விதம் குறித்து உச்ச நீதிமன்ற நீதிபதிகள் தங்களது அதிருப்தியையும் வெளிப்படுத்தினர். மாநில அரசின் சார்பில் ஆஜரான சொலிசிட்டர் ஜெனரல் துஷார் மேத்தா, இது முழுக்க முழுக்க முன்கூட்டியே திட்டமிட்டு நடத்தப்பட்ட அதிர்ச்சியூட்டும் கொலை வழக்கு என்றும், சாதாரண எழுத்துப்பிழையைக் காரணம் காட்டி குற்றவாளியை தொழில்நுட்ப அடிப்படையில் விடுவிப்பது தவறான முன்னுதாரணமாகிவிடும் என்றும் வாதிட்டார். தற்போது இந்த விவகாரத்தில் சோனம் ரகுவன்ஷி தரப்பிற்கு நோட்டீஸ் அனுப்பியுள்ள உச்ச நீதிமன்றம், மாநில அரசின் மனு குறித்து விரிவான பதிலளிக்குமாறு உத்தரவிட்டு, வழக்கின் அடுத்தகட்ட விசாரணையை ஒத்திவைத்துள்ளது.