“விஜய் அரசை காலி செய்ய ரகசிய ஸ்கெட்ச்.. தவெக எம்.எல்.ஏ-க்களை குறிவைத்த ‘மேகாலயா’ ஆபரேஷன்.. அம்பலமான ரகசியம்.. ஆடிப்போன தமிழக அரசியல்”..!!

தமிழகத்தில் ஆளும் முதலமைச்சர் சி. ஜோசப் விஜய் தலைமையிலான தமிழக வெற்றிக் கழக அரசைத் கவிழ்க்கும் நோக்கில், அக்கட்சியின் எம்.எல்.ஏ.க்களைப் பணம் மற்றும் சலுகைகள் மூலம் விலைக்கு வாங்க முயற்சி நடந்ததாக எழுந்துள்ள குற்றச்சாட்டு மாநில அரசியலில் பெரும் புயலைக் கிளப்பியுள்ளது. தவெக-வின் ஊத்தங்கரை தொகுதி சட்டமன்ற உறுப்பினர் இளையராஜா அளித்த புகாரின் அடிப்படையில் இந்த வழக்கை விசேடப் பிரிவினர் தீவிரமாக விசாரித்து வருகின்றனர். சட்டப்பேரவை நம்பிக்கை வாக்கெடுப்பில் அரசுக்கு எதிராக வாக்களிக்கத் தனக்குப் பண ஆசை காட்டப்பட்டதாகவும், அந்த முன்மொழிவை தான் நிராகரித்ததால் தனக்கும் தனது குடும்பத்தினருக்கும் மிரட்டல்கள் விடுக்கப்பட்டதாகவும் எம்.எல்.ஏ. இளையராஜா தனது புகாரில் பரபரப்புக் குற்றச்சாட்டை முன்வைத்துள்ளார்.

இந்தக் குதிரை பேர முயற்சி “ஆபரேஷன் மேகாலயா” என்ற பெயரில் திரைமறைவில் அரங்கேறியதாக ஊடக வட்டாரங்களில் செய்திகள் பரவி வந்தாலும், அந்தப் பெயர் குறித்துக் காவல்துறை தரப்பில் இதுவரை அதிகாரப்பூர்வ உறுதிப்படுத்தல் எதுவும் வெளியாகவில்லை. எனினும், இந்த வழக்கின் விசாரணையின் ஒரு பகுதியாகத் தனியார் தொலைக்காட்சி செய்தியாளர் ஒருவர் இரவு நேரத்தில் விசாரணைக்கு அழைக்கப்பட்ட விவகாரம் பெரும் சர்ச்சையை ஏற்படுத்தியுள்ளது. இதற்குப் பல்வேறு அரசியல் கட்சிகளும் பத்திரிகையாளர் அமைப்புகளும் கடும் கண்டனம் தெரிவித்துள்ள நிலையில், சட்ட விதிமுறைகளுக்கு உட்பட்டே விசாரணை நடத்தப்பட்டதாகக் காவல்துறை தரப்பில் விளக்கம் அளிக்கப்பட்டுள்ளது.

மறுபுறம், ஆளும் தவெக அரசின் இந்த ஒட்டுமொத்தக் குற்றச்சாட்டுகளையும் பிரதான எதிர்க்கட்சியான திமுக முற்றிலுமாக மறுத்துள்ளது. அரசியல் உள்நோக்கத்துடனும் தவெக அரசின் நிர்வாகத் தோல்விகளை மறைக்கவுமே இத்தகைய ஆதாரமற்ற புகார்கள் சுமத்தப்படுவதாகவும், இதனைச் சட்டரீதியாக எதிர்கொள்ளத் தாராளமாகத் தயாராக இருப்பதாகவும் திமுக தரப்பில் தெரிவிக்கப்பட்டுள்ளது. இந்த வழக்கில் ஏற்கனவே சிலர் கைது செய்யப்பட்டுள்ளதோடு, மேலும் பலருக்குச் சம்மன் அனுப்பப்பட்டு விசாரணை வளையத்திற்குள் கொண்டு வரப்பட்டுள்ளதால், இந்த அரசியல் சதியின் பின்னணியில் உள்ள இறுதி உண்மை நீதிமன்ற முடிவுகளுக்குப் பிறகே முழுமையாகத் தெரியவரும்.