மர்ம மரணம்..! 10-வது மாடியில் இருந்து விழுந்து பெண் பலி.. காதலனுடன் தங்கியிருந்த சில மணி நேரங்களில் நேர்ந்த பயங்கரம்..! ஹோட்டல் அறைக்குள் நடந்தது என்ன..?!

உத்தரப் பிரதேசத் தலைநகர் லக்னோவின் சுஷாந்த் கோல்ஃப் சிட்டி காவல் எல்லைக்குட்பட்ட ஓமேக்ஸ் கட்டிடத்தின் 10-வது மாடியில் இருந்து விழுந்து 24 வயது இளம் பெண் ஒருவர் சந்தேகத்திற்கிடமான முறையில் உயிரிழந்தார். இறந்துபோன பெண் லக்னோவின் சௌக் பகுதியைச் சேர்ந்த சமரீன் என அடையாளம் காணப்பட்டுள்ளார். இவர் சுல்தான்பூரைச் சேர்ந்த அவ்னீஷ் என்ற தனது காதலனுடன் அந்த ஹோட்டலில் உள்ள அறையில் தங்கியிருந்தார். சம்பவம் நடந்தவுடனேயே பெண்ணின் காதலன் சம்பவ இடத்திலிருந்து தப்பியோடிவிட்டார்.

காவல்துறையினருக்கு ஹோட்டல் செலேஷியல் ஓமேக்ஸ் நியூ ஹசரத்கஞ்ச் பாதுகாப்புப் அதிகாரியிடமிருந்து தகவல் கிடைத்தது. அதன்படி, அன்றைய தினம் காலை சுமார் 11:46 மணிக்கு சமரீன் மற்றும் அவ்னீஷ் ஆகிய இருவரும் அறை எண் 1037-ல் தங்குவதற்காகச் சென்றுள்ளனர். பின்னர் மாலை சுமார் 6 மணியளவில் அப்பெண் அதே அறையிலிருந்து கீழே விழுந்து இறந்துள்ளார். தகவல் அறிந்து சம்பவ இடத்திற்கு விரைந்த காவல்துறையினர், ஃபீல்ட் யூனிட் உதவியுடன் புகைப்படம் மற்றும் வீடியோ ஆதாரங்களைச் சேகரித்து, உடலைக் கைப்பற்றி பிரேதப் பரிசோதனைக்காக அனுப்பி வைத்தனர். மேலும் இச்சம்பவம் குறித்து பெண்ணின் குடும்பத்தினருக்கும் தகவல் தெரிவிக்கப்பட்டுள்ளது.

தற்போது வரை அப்பெண் எந்தச் சூழ்நிலையில் கீழே விழுந்து உயிரிழந்தார் என்பது தெளிவாகத் தெரியவில்லை. இது தற்கொலையா அல்லது வேறு ஏதேனும் அசம்பாவிதமா என்றும், சம்பவம் நடந்தபோது அங்கு நிலவிய சூழ்நிலைகள் குறித்தும் காவல்துறையினர் தீவிரமாக விசாரணை நடத்தி வருகின்றனர். தலைமறைவாக உள்ள காதலனைப் பிடிக்கும் முயற்சியிலும் ஈடுபட்டுள்ளனர். பெண்ணின் பெற்றோர் அளிக்கும் புகாரின் அடிப்படையில் அடுத்தகட்ட சட்டப்பூர்வ நடவடிக்கை எடுக்கப்படும் என்றும், பிரேதப் பரிசோதனை அறிக்கை மற்றும் விசாரணையின் அடிப்படையில் உயிரிழப்பிற்கான உண்மையான காரணம் தெரியவரும் என்றும் காவல்துறை தரப்பில் தெரிவிக்கப்பட்டுள்ளது.