“தந்தை இறப்பில் சிரித்தாரா..?” பிரதீப் ராவத் மகனை ட்ரோல் செய்த நெட்டிசன்கள்… உண்மை பின்னணி இதோ..!!

பிரபல மூத்த நடிகர் பிரதீப் ராவத் அவர்களின் மறைவுக்குப் பிறகு, முழு திரையுலகமும் அவருடைய குடும்பத்தினரும் ஆழ்ந்த துயரத்தில் மூழ்கியுள்ளனர். இந்நிலையில், அவருடைய இல்லத்திற்குப் பாப்பராசிகள் வருகை தந்தனர். அப்போது பிரதீப் ராவத்தின் மகன் விக்ரமாதித்ய ராவத் தோன்றிய வீடியோ ஒன்று சமூக வலைதளங்களில் வெளியாகிப் பெரும் விவாதத்தைக் கிளப்பியது. கேமராக்களின் முன்னால் அவர் லேசாகச் சிரிப்பது போலக் காணப்பட்டதால், இணையவாசிகள் அவரை விமர்சித்து மிகக் கடுமையான கருத்துகளுடன் ட்ரோல் செய்யத் தொடங்கினர்.

ஆனால், மற்றொரு வீடியோவில் தனது தந்தையின் இறுதிச் சடங்குகளை நிறைவேற்றும்போது விக்ரமாதித்ய கண்ணீர் விட்டு கதறி அழுது உடைந்துபோன காட்சி வெளியானது. கேமராக்களின் முன் நின்றபோது ஏற்பட்ட பதற்றம் மற்றும் என்ன செய்வதென்று தெரியாத சூழ்நிலையில் வெளிப்பட்ட ஒரு எதிர்வினையை மட்டும் வைத்துக்கொண்டு, ஒரு நபரின் துக்கத்தையும் உணர்வுகளையும் சமூக வலைதளங்களில் தீர்மானிப்பது எந்த வகையில் நியாயம் என்ற கேள்விகள் தற்போது எழுந்துள்ளன. துக்ககரமான சூழலில் இருக்கும்போது ஒவ்வொரு நபரும் ஒரே மாதிரியாக எதிர்வினை ஆற்றுவதில்லை என்ற குறைந்தபட்ச மனிதநேயத்தைப் புரிந்துகொள்ள வேண்டும் என்று கூறி பலர் அவருக்கு ஆதரவாகக் குரல் கொடுத்து வருகின்றனர்.

‘கஜினி’, ‘லகான்’ போன்ற திரைப்படங்கள் மற்றும் மகாபாரதம் தொடரில் அஸ்வத்தாமன் கதாபாத்திரத்தின் மூலம் இந்திய திரையுலகம் முழுவதும் பெரும் புகழ்பெற்ற மூத்த நடிகர் பிரதீப் ராவத், இரத்தப் புற்றுநோயால் பாதிக்கப்பட்டிருந்தார். சமீபத்தில் சிகிச்சை பலனின்றி மும்பையில் அவர் காலமானார். தனது தனித்துவமான வில்லன் நடிப்பால் கோடிக்கணக்கான ரசிகர்களின் இதயங்களை வென்ற இவரது மறைவுக்குத் திரையுலகப் பிரபலங்களும் ரசிகர்களும் ஆழ்ந்த இரங்கலைத் தெரிவித்து வருகின்றனர்.