அச்சச்சோ… குரங்கு தள்ளிவிட்டு 91 வயது பாட்டி உயிரிழப்பு..! நெஞ்சை பதறவைக்கும் சிசிடிவி வீடியோ..!!

கர்நாடக மாநிலத்தின் கொப்பால் மாவட்டத்தில் சனிக்கிழமை மாலை வேளையில் 91 வயதான நஜ்முன்னிசா பேகம் என்ற முதியவர் தனது வீட்டின் வெளியே நின்று கொண்டிருந்தபோது, குரங்கு ஒன்று திடீரென அவரைத் தள்ளிவிட்டதில் அவர் பரிதாபமாக உயிரிழந்தார். வீட்டிற்கு வெளியே சத்தம் கேட்டதையடுத்து நஜ்முன்னிசா வெளியே வந்து பார்த்தபோது, எதிர்பாராத விதமாக ஒரு குரங்கு அவர் மீது பாய்ந்து கீழே தள்ளியது. இதில் கீழே விழுந்த அவருக்குத் தலையில் பலத்த காயம் ஏற்பட்டது.

இதனைத் தொடர்ந்து, அங்கிருந்தவர்கள் உடனடியாக அவரை சிகிச்சைக்காக அருகில் உள்ள மருத்துவமனைக்குக் கொண்டு சென்றனர். இருப்பினும், சிகிச்சை பலனின்றி அவர் பரிதாபமாக உயிரிழந்தார். இந்தச் சம்பவம் நடந்தபோது, சத்தம் கேட்டு வீட்டிலிருந்த மற்றொரு முதிய பெண்மணியும் வெளியே ஓடிவந்தார். அந்தப் பெண்ணையும் குரங்கு தாக்க நெருங்கியது. ஆனால், சத்தம் கேட்டு அக்கம் பக்கத்தினர் உடனடியாக சம்பவ இடத்திற்கு விரைந்து வந்ததால், அந்த குரங்கு அங்கிருந்து தப்பி ஓடியது.

இந்தக் கொடூரச் சம்பவம் முழுவதும் அங்குப் பொருத்தப்பட்டிருந்த சிசிடிவி கேமராவில் பதிவாகியுள்ளது. நஜ்முன்னிசா சத்தம் கேட்டு வெளியே வருவது, திடீரென குரங்கு பாய்ந்து அவரைத் தள்ளிக் கீழே வீழ்த்துவது மற்றும் சத்தம் கேட்டு மற்றொரு பெண்மணி வெளியே ஓடிவருவது வரையிலான அனைத்துக் காட்சிகளும் அதில் மிகத் தெளிவாகப் பதிவாகியுள்ளன.