15 வருஷத்துல இதுவே முதல்முறை..! அரசுப் பள்ளி மதிய உணவில் திடீரென நிறுத்தப்பட்ட முட்டை.. பின்னணியில் நடந்தது என்ன..?!

நாமக்கல், ஈரோடு, சேலம், திருநெல்வேலி மற்றும் நாகப்பட்டினம் மாவட்டங்களில் உள்ள அரசுப் பள்ளிகளில் வழங்கப்பட்ட மதிய உணவில் முட்டைகள் வழங்கப்படவில்லை. இதனால் மாணவர்கள் அதிர்ச்சி அடைந்தனர். அதே சமயம் திருப்பூர், மயிலாடுதுறை மற்றும் திண்டுக்கல் மாவட்டங்களில் உள்ள பள்ளிகளுக்கு முட்டைகள் வழங்கப்பட்டதாகவும் கூறப்படுகிறது.

இதுகுறித்து ஆசிரியர்கள் கூறும்போது, கடந்த பத்தாண்டுகளில் இதுபோன்ற ஒரு குறைபாட்டைத் தாங்கள் கண்டதில்லை என்று தெரிவித்தனர். மேலும் காலாண்டுத் தேர்வுகள் முடிவடைந்த நிலையில், பள்ளிகளின் செயல்பாடு குறித்த தகவல் தொடர்பில் ஏற்பட்ட குழப்பத்தால் இந்தச் சம்பவம் நிகழ்ந்ததாகக் கூறப்படுகிறது. அத்துடன் முட்டைகளின் தேவை குறித்த தகவல் பரிமாற்றக் குறைபாடு காரணமாக, சில மாவட்டங்களில் உள்ள அதிகாரிகள் விநியோகஸ்தர்களுக்கு தகவல் அனுப்பத் தவறியதால் இந்த குளறுபடி ஏற்பட்டதாகவும் தெரிவித்தனர்.

கடந்த 15 ஆண்டுகளில் இதுபோன்ற சம்பவம் நடந்தது இதுதான் முதல் முறை என சத்துணவுப் பணியாளர்கள் கூறினர். இதற்கிடையில், தமிழ்நாடு உயர் மற்றும் மேல்நிலைப் பள்ளி பட்டதாரி ஆசிரியர்கள் சங்கத்தின் மாநிலத் தலைவர் ஏ. மலைக்கொழுந்தன் கூறுகையில், இந்த குறைபாடு குறித்து விசாரணை நடத்த வேண்டும் என முதலமைச்சர் மற்றும் தலைமைச் செயலாளருக்கு கோரிக்கை மனு அளித்துள்ளதாகத் தெரிவித்தார். மாநிலம் முழுவதும் இத்திட்டம் சீராகச் செயல்படுத்தப்பட்ட போதிலும், சில மாவட்டங்களில் உள்ள மாணவர்களுக்கு முட்டைகள் வழங்கப்பட்டதாகவும், மற்ற மாவட்டங்களில் உள்ள மாணவர்களுக்கு வழங்கப்படவில்லை என்றும் கூறப்படுகிறது. எனவே இதற்குப் பொறுப்பானவர்கள் மீது நடவடிக்கை எடுக்கவும், இனி வரும் நாட்களில் தடங்கலின்றி முட்டை விநியோகம் செய்யப்படுவதை அரசு உறுதி செய்ய வேண்டும் என்றும் அவர் கூறினார்.