“ஸ்கூல்ல ஒரே ஒரு பொண்ணுதான் படிக்கிறா…” அந்த ஒரு குழந்தைக்காக இந்த 55 வயது ஆசிரியர் செஞ்ச விஷயம் இருக்கே… மனதை நெகிழ வைக்கும் சம்பவம்..!!

மகாராஷ்டிர மாநிலம் கோலாப்பூர் மாவட்டத்தில் உள்ள ககன்பாவடா தாலுகாவைச் சேர்ந்த ‘கவள்டெக் தனகர்வடா’ கிராமத்தின் ஜில்லா பரிஷத் பள்ளியில், 55 வயதான ஆசிரியர் ஜீவன் மித்தாரி கடந்த 13 ஆண்டுகளாகப் பணியாற்றி வருகிறார். மின்சாரமோ, வாகனப் போக்குவரத்திற்கான பாதையோ இல்லாத இந்த மிகக் கரடுமுரடான கிராமத்தில் உள்ள பள்ளிக்குச் செல்ல, பிரதான சாலையில் இருந்து சென்று வர தினமும் 5 கிலோமீட்டர் தூரம் அடர்ந்த காட்டு வழியில் நடப்பதே இவருடைய வழக்கமாகும். இந்த கடுமையான பயணத்திற்கு மத்தியிலும், அந்தப் பள்ளியில் படிக்கும் ஸ்வரா போட்கே என்ற ஒரே ஒரு 3-ஆம் வகுப்பு மாணவியின் எதிர்காலத்தை உருவாக்குவதற்காகவே இவர் நாள்தோறும் பள்ளிக்குச் சென்று வருகிறார்.

கடந்த 2013-ஆம் ஆண்டு ஜூலை 26 அன்று ஜீவன் மித்தாரி முதன்முதலில் இந்தப் பள்ளிக்கு நியமிக்கப்பட்டார். ஆரம்பத்தில் கோலாப்பூர் மாவட்ட தொடக்கப்பள்ளி ஆசிரியர்கள் கூட்டுறவு வங்கியின் தலைவராக இருந்த இவரை, வசதியான ஆசிரியர்கள் மட்டுமே எளிதான இடங்களுக்கு மாற்றலாகிச் செல்கிறார்கள் என்றும், மற்றவர்கள் கடினமான இடங்களுக்கு அனுப்பப்படுகிறார்கள் என்றும் சக ஆசிரியர்கள் கிண்டல் செய்தனர். அதை ஒரு சவாலாக ஏற்றுக்கொண்ட மித்தாரி, தானாகவே முன்வந்து இந்த கிராமத்திற்குத் தற்காலிகமாக அல்லாமல் நிரந்தர மாற்றல் பெற்று வந்தார். முன்பு இங்கு 70 முதல் 100 குடும்பங்கள் வரை வாழ்ந்ததால் குழந்தைகளின் எண்ணிக்கை அதிகமாக இருந்தது. ஆனால், வாழ்வாதாரத்தைத் தேடி பெரும்பாலான மக்கள் கோலாப்பூர் நகரத்திற்கு இடம்பெயர்ந்ததால், தற்போது அந்தப் பள்ளியில் ஒரே ஒரு மாணவி மட்டுமே அதிகாரப்பூர்வமாகப் படித்து வருகிறார்.

பள்ளிக்குச் செல்லும் இந்த காட்டுவழிப் பயணம் மிகவும் ஆபத்தானது; வழியில் சிறுத்தைகள், காட்டெருமைகள் போன்ற வனவிலங்குகளின் நடமாட்டம் அதிகமாக இருக்கும். இதனால் பயணத்தின் போது வழியில் எங்கும் நிற்கவோ உட்காரவோ கூடாது என்று அதிகாரிகளே இவருக்கு அறிவுறுத்தியுள்ளனர். 11 கிலோமீட்டர் சுற்றளவில் வேறு எந்தப் பள்ளியும் இல்லாததாலும், மழைக்காலங்களில் அந்தச் சிறிய குழந்தையால் அவ்வளவு தூரம் நடந்து செல்ல முடியாது என்பதாலும், மாணவர்கள் எண்ணிக்கை குறைவாக இருந்தாலும் தனது கடமையை ஆற்றுவதற்காக மித்தாரி தினமும் பள்ளிக்குச் செல்கிறார். 2029 மே மாதத்தில் ஓய்வுபெறவுள்ள இந்த ஆசிரியரின் அர்ப்பணிப்பு உணர்வு அனைவராலும் பெரிதும் பாராட்டப்பட்டு வருகிறது.