“பணக்காரன் ஆக வேண்டுமென ஆசை” ரூ.6 லட்சம் கடன், ஆன்லைன் சூதாட்டம், கடன் செயலி மிரட்டல்.. கடைசியில் அவமானம்… இளைஞர் கழுத்தை அறுத்து தற்கொலை..!!

ஆந்திரப் பிரதேச மாநிலம் நந்தியாலா மாவட்டத்தைச் சேர்ந்த 23 வயதான மனோகர் என்ற வாலிபர், ஆன்லைன் கிரிக்கெட் சூதாட்டத்தில் ஈடுபட்டுப் பெருமளவில் பணத்தை இழந்துள்ளார். ஒரு மளிகைக் கடையில் வேலை பார்த்து வந்த இவர், இழந்த பணத்தை மீட்கும் முயற்சியில் பல போலி ஆன்லைன் கடன் செயலிகள் மூலம் சுமார் 6 லட்சம் ரூபாய் வரை கடன் வாங்கியுள்ளார். கூலித் தொழில் செய்யும் ஏழைப் பெற்றோரின் மகனான இவரால் அந்தக் கடனைத் திருப்பிக் செலுத்த முடியவில்லை.

கடன் தொகையைத் திரும்பப் பெறுவதற்காகக் கடன் செயலியின் முகவர்கள் மனோகருக்குத் தொடர்ந்து போன் மூலம் கடுமையான மிரட்டல்களும், மனரீதியான துன்புறுத்தல்களும் அளித்து வந்ததாகக் கூறப்படுகிறது. இதனால் ஏற்பட்ட அவமானத்திற்கும் கடுமையான மன உளைச்சலுக்கும் பயந்த மனோகர், வீட்டில் யாரும் இல்லாத நேரத்தில் சமையலறை கத்தியால் தன் கழுத்தை அறுத்துக் கொண்டு தற்கொலைக்கு முயன்றார்.

படுகாயமடைந்த அவரை மீட்டு கர்நூல் அரசு மருத்துவமனைக்குக் கொண்டு சென்ற போதிலும், சிகிச்சை பலனின்றி அவர் உயிரிழந்தார். இச்சம்பவம் தொடர்பாக வழக்குப்பதிவு செய்துள்ள நந்தியாவர்கம் காவல்துறையினர், மிரட்டல் விடுத்த கடன் செயலிகள் குறித்து விசாரணை நடத்தி வருகின்றனர். மேலும், ஆன்லைன் சூதாட்டம் மற்றும் போலி கடன் செயலிகளின் ஆபத்துகள் குறித்து இளைஞர்களும் பெற்றோர்களும் விழிப்புடன் இருக்குமாறு காவல்துறை எச்சரித்துள்ளது.