சொத்துப்பிரச்சினைக்காக ஒரு உயிரே போச்சு… சொந்தத் தாய்மாமாவே அரிவாளால் வெட்டி வாலிபர் படுகொலை… நெல்லையில் பயங்கரம்..!!

திருநெல்வேலி மாவட்டம் மானூர் அருகே உள்ள சுப்பையாபுரத்தைச் சேர்ந்த முத்துக்காளை (30) என்ற இளைஞர், சொத்துப் பிரச்சினை காரணமாக ஏற்பட்ட முன்விரோதத்தில் அரிவாளால் வெட்டப்பட்டுக் கொடூரமாகக் கொலை செய்யப்பட்டுள்ளார். கடந்த அக்டோபர் 9ஆம் தேதி காலை இந்தத் துயரச் சம்பவம் நிகழ்ந்துள்ளது.

இந்தக் கொலைச் சம்பவத்தில் முத்துக்காளையின் சொந்தத் தாய்மாமாவான தாமஸ்பாண்டியன் (39) மற்றும் அவரது உறவினர் அஜீத்குமார் (28) ஆகிய இருவருக்கும் நேரடித் தொடர்பு இருப்பதாகக் கூறப்படுகிறது. சொத்துத் தகராறு முற்றிய நிலையில், அவர்கள் இருவரும் சேர்ந்து முத்துக்காளையை அரிவாளால் பயங்கரமாகத் தாக்கியுள்ளனர்.

தலை மற்றும் உடலில் பலத்த வெட்டுக் காயங்களுடன் உயிருக்குப் போராடிக் கொண்டிருந்த முத்துக்காளை, உடனடியாக மீட்கப்பட்டு திருநெல்வேலி அரசு மருத்துவக் கல்லூரி மருத்துவமனைக்கு சிகிச்சைக்காக அனுமதிக்கப்பட்டார். எனினும், தீவிர சிகிச்சை பலனின்றி அவர் பரிதாபமாக உயிரிழந்தார். இந்தச் சம்பவம் குறித்து மானூர் போலீசார் வழக்குப் பதிவு செய்து, தப்பியோடிய குற்றவாளிகளைத் தீவிரமாகத் தேடி விசாரணை நடத்தி வருகின்றனர்.