“துப்பாக்கியைத் துடைக்கும்போது வெடித்தது..” 33 வயது பேரனுக்கு நேர்ந்த கொடூரம்.. பிரேத பரிசோதனையில் அம்பலமான 83 தாத்தாவின் ‘ஸ்கெட்ச்’.. பரபரப்பு பின்னணி..!!

மகாராஷ்டிர மாநிலம் புனேவின் லோனாவாலா பகுதியில் உள்ள பூஷி கிராமத்தில், சொத்து தகராறு காரணமாக 83 வயதான தாத்தா தனது 33 வயது வழக்கறிஞர் பேரனைத் துப்பாக்கியால் சுட்டுக் கொன்ற கொடூரச் சம்பவம் வெளிச்சத்திற்கு வந்துள்ளது. உயிரிழந்தவர் லோனாவலாவின் முன்னாள் நகராட்சி மன்ற உறுப்பினர் மாணிக் மராத்தேயின் மகனும், வழக்கறிஞருமான அபய் மாணிக் மராத்தே என அடையாளம் காணப்பட்டுள்ளார். லோனாவலாவில் உள்ள மோதிராம் ஹோட்டல் வளாகத்தில் நிலம் மற்றும் சொத்துப் பரிவர்த்தனைகள் தொடர்பாக இருவருக்கும் இடையே ஏற்பட்ட கடுமையான வாக்குவாதம் முற்றியதில், ஆத்திரமடைந்த தாத்தா மோதிராம் ராஜீவ் மராத்தே தான் சட்டப்பூர்வமாக வைத்திருந்த 12-போர் ரகத் துப்பாக்கியால் பேரனின் மார்பில் சுட்டுள்ளார்.

துப்பாக்கிச் சூட்டுக் காயமடைந்த அபய் அன்றே உயிரிழந்த நிலையில், துப்பாக்கியைச் சுத்தம் செய்யும்போது தவறுதலாக விசை இழுக்கப்பட்டதாகக் கூறி குடும்பத்தினர் ஆரம்பத்தில் காவல்துறையைத் தவறாக வழிநடத்தினர். இதனால் லோனாவலா நகர போலீஸார் இதனை ஒரு விபத்து மரண வழக்காகவே முதலில் கருதினர். இருப்பினும், பிரேதப் பரிசோதனை செய்த மருத்துவரின் அறிக்கை மற்றும் உடலில் இருந்த தழும்புகள், இது தற்செயலாக நிகழ்ந்தது அல்ல என்றும், மிக நெருங்கிய தூரத்திலிருந்து நேரடியாக மார்பில் சுடப்பட்டது என்பதையும் தெளிவுபடுத்தியதை அடுத்து இந்த விவகாரம் நன்கு திட்டமிடப்பட்ட கொலை மர்மமாக மாறியது.

விசாரணையில், தாத்தா மோதிராம் மராத்தே தனது சொத்தின் ஒரு பகுதியை விற்க விரும்பியதை வழக்கறிஞர் பேரன் அபய் வன்மையாக எதிர்த்ததே இந்தத் துப்பாக்கிச் சூட்டிற்குக் காரணம் எனத் தெரியவந்தது. மேலும், கொலையை மறைக்க ஹோட்டல் வளாகத்தில் இருந்த சிசிடிவி கேமராவின் டிவிஆர் அகற்றப்பட்டு மறைக்கப்பட்டதும், ஹோட்டல் ஊழியர்கள் மிரட்டப்பட்டதும் கண்டுபிடிக்கப்பட்டது. இதையடுத்து, முக்கியக் குற்றவாளியான தாத்தா மோதிராமுடன் சேர்ந்து, கொலையை மறைக்கவும் ஆதாரங்களை அழிக்கவும் சதி செய்த குற்றத்திற்காக அவரது குடும்ப உறுப்பினர்களான ஹிராமன் மராத்தே, மனோஜ் மராத்தே, கவிதா மராத்தே மற்றும் ராஜ்ஸ்ரீ பவார் ஆகிய ஐந்து பேர் மீதும் புனே ஊரக போலீஸார் கடுமையான பிரிவுகளின் கீழ் வழக்குப் பதிவு செய்துள்ளனர்.