LATEST NEWS
“இதுதான் அரசு வேலையா?” 9 மாத கர்ப்பிணியை 2 மணி நேரம் காத்திருக்க வைத்துவிட்டு லஞ்ச் சாப்பிட்ட வங்கி ஊழியர்கள்.. இணையத்தை உலுக்கும் வைரல் வீடியோ..!!
கனரா வங்கி கிளை ஒன்றில் 9 மாத கர்ப்பிணி பெண் ஒருவர் தனது கணக்கை மீண்டும் தொடங்குவதற்காக சுமார் 2 மணி நேரம் காத்திருக்க வைக்கப்பட்டதாகக் கூறப்படும் வீடியோ சமூக வலைத்தளங்களில் வைரலாகி பெரும் அதிர்வலைகளை ஏற்படுத்தியுள்ளது. அந்த வீடியோவில், வங்கி ஊழியர்கள் மதிய உணவு சாப்பிட்டுக் கொண்டிருக்க, அந்த முழு மாத கர்ப்பிணி பெண் மிகுந்த அசௌகரியத்துடன் அமர்ந்திருக்கும் காட்சிகள் பதிவாகியுள்ளன. இந்தச் சம்பவம் எங்கு நடந்தது என்பது குறித்த துல்லியமான விவரங்கள் இன்னும் அதிகாரப்பூர்வமாக உறுதிப்படுத்தப்படவில்லை.
அங்கு வந்திருந்த மற்றொரு வாடிக்கையாளர் இந்த அவல நிலையைத் தனது மொபைல் போனில் வீடியோவாக எடுத்து, பொதுத்துறை வங்கிகளின் செயல்பாடுகளைக் கடுமையாகச் சாடியுள்ளார். வங்கி ஊழியர்கள் தங்களது மதிய உணவை முடித்த பிறகும் கூட, அந்தப் பெண்ணுக்கு உதவ முன்வராமல் வேண்டுமென்றே தாமதப்படுத்தியதாக அவர் குற்றம் சாட்டியுள்ளார். 9 மாத கர்ப்பிணியாக இருக்கும் ஒரு பெண்ணுக்கு முன்னுரிமை கொடுத்து, மனிதாபிமான அடிப்படையில் அவரது வேலையைச் செய்து முடித்திருக்க வேண்டும் என நெட்டிசன்கள் பலரும் கனரா வங்கி நிர்வாகத்திற்கு எதிராகக் கொந்தளித்து வருகின்றனர்.
அதே வேளையில், இந்த விவகாரத்தில் இணையவாசிகள் மத்தியில் இருவேறு கருத்துக்கள் நிலவி வருகின்றன. வங்கி ஊழியர்கள் என்னதான் அவசர வேலை இருந்தாலும், தொடர்ந்து பல மணி நேரம் வேலை செய்வதால் அவர்களுக்கும் மதிய உணவு இடைவேளை என்பது அடிப்படை உரிமை என ஒரு தரப்பினர் ஊழியர்களுக்கு ஆதரவாக வாதிடுகின்றனர். மேலும், வங்கியின் பாதுகாப்பு விதிகளின்படி உள்ளே வீடியோ எடுப்பது தடைசெய்யப்பட்டுள்ளது என்றும், அதை மீறி வீடியோ எடுத்து ஊழியர்களை மட்டும் தவறு கூறக் கூடாது என்றும் அவர்கள் தங்களது கருத்துக்களைப் பதிவு செய்து வருகின்றனர்.
