“அட யாருடா நீ..! கடனுக்குப் பதிலாகப் போலி தங்கக் கல் கொடுத்து… 13 லட்ச ரூபாயை ஆட்டையைப் போட்ட பலே கில்லாடி..!!”

தெலங்கானா மாநிலம் நிஜாமாபாத் மாவட்டத்தில் கடனைத் திருப்பிச் செலுத்துவதாகக் கூறி நடத்தப்பட்ட ஒரு வினோதமான மோசடிச் சம்பவம் வெளிச்சத்திற்கு வந்துள்ளது. டிச்பல்லி காவல் எல்லைக்குட்பட்ட பகுதியில், நபர் ஒருவர் சாதாரணக் கற்கள் மீது தங்க முலாம் பூசி, அதை அபூர்வப் புதையலில் கிடைத்த தங்கக் கற்கள் எனக் கூறித் தனக்குக் கடன் கொடுத்த நபரை ஏமாற்றியுள்ளார். இச்சம்பவம் தொடர்பாகப் பாதிக்கப்பட்ட நபர் அளித்த புகாரின் பேரில் காவல்துறையினர் வழக்குப்பதிவு செய்து விசாரணையைத் தொடங்கியுள்ளனர்.

காவல்துறையின் தகவல்படி, ஸ்ரீனிவாஸ் என்பவர் நிஜாமாபாத் நகரின் ஹமால்வாடி பகுதியைச் சேர்ந்த ரமேஷ் என்பவரிடம் ரூ.13 லட்சம் கடனாகப் பெற்றிருந்தார். நீண்ட நாட்களாகக் கடனைத் திரும்பக் கொடுக்காததால், ரமேஷ் பணத்தைத் தருமாறு தொடர்ந்து நெருக்கடி அளித்துள்ளார். கடனை அடைக்க முடியாத ஸ்ரீனிவாஸ், தனக்கு ஒரு புதையல் கிடைத்திருப்பதாகவும், அதில் தங்கக் கற்கள் உள்ளதாகவும் கூறி ரமேஷை நம்ப வைத்துள்ளார். மேலும், திச்பல்லி மண்டலத்திலுள்ள கன்பூர் பகுதிக்கு ரூ.32,000 ரொக்கப் பணத்துடன் வருமாறு ரமேஷிடம் கூறியுள்ளார். அதை உண்மையென நம்பி அங்கு சென்ற ரமேஷிடம் பணத்தைப் பெற்றுக்கொண்டு, தங்கக் கற்கள் எனக் கூறி நான்கு கற்களை ஸ்ரீனிவாஸ் கொடுத்துள்ளார்.

அந்தக் கற்களை வாங்கிச் சென்று கூர்ந்து கவனித்துப் பரிசோதித்த ரமேஷிற்கு சந்தேகம் ஏற்பட்டது. அவை உண்மையான தங்கம் அல்ல, சாதாரணக் கற்களின் மீது தங்க முலாம் பூசப்பட்டுத் தான் ஏமாற்றப்பட்டிருப்பதை உணர்ந்தார். உடனடியாக ரமேஷ் டிச்பல்லி காவல் நிலையத்தில் புகார் அளித்தார். புகாரின் பேரில் வழக்குப் பதிவு செய்த காவல்துறையினர், தலைமறைவாக உள்ள ஸ்ரீனிவாஸைப் பிடிக்கவும் அவர் மீது சட்டப்பூர்வ நடவடிக்கை எடுக்கவும் விசாரணை நடத்தி வருகின்றனர். மேலும், புதையல் மற்றும் தங்கப் பொருட்கள் எனக் கூறி நடத்தப்படும் இது போன்ற மோசடிகளிடம் பொதுமக்கள் விழிப்புணர்வுடன் இருக்குமாறு காவல்துறை கேட்டுக்கொண்டுள்ளது.