நெஞ்சை பதற வைக்கும் சோகம்..! பள்ளியிலிருந்து வீடு திரும்பிய 11 வயது சிறுமி… திறந்த மேன்ஹோலில் விழுந்து மாயம்..! புலந்த்சஹரில் தொடரும் மீட்புப் போராட்டம்..!!

உத்தரப் பிரதேச மாநிலம் புலந்த்சஹர் மாவட்டத்தில் உள்ள சாடா பகுதியில் செவ்வாய்க்கிழமை கனமழை பெய்தது. அப்போது சுசீலா இன்டர்நேஷனல் பள்ளியில் 4-ஆம் வகுப்பு படிக்கும் 11 வயது சிறுமி, பள்ளியிலிருந்து நடந்து வீட்டிற்குத் திரும்பிக் கொண்டிருந்தார். திடீரெனப் பெய்த கனமழையிலிருந்து தப்பிப்பதற்காக, அங்குள்ள திறந்தவெளி சாக்கடை நகர்ப்புறக் கால்வாயின் மேல் வைக்கப்பட்டிருந்த பலகை மீது ஏறி நின்றுள்ளார். மழைநீரால் சாக்கடை பெருக்கெடுத்து ஓடிய நிலையில், நீர் தேங்கியதால் சாக்கடையின் ஆழத்தை உணர முடியாமல் சிறுமி நிலைதடுமாறி, திறந்து கிடந்த மேன்ஹோல் போன்ற சாக்கடைக்குள் விழுந்து நீரோட்டத்தில் அடித்துச் செல்லப்பட்டார்.

இச்சம்பவம் குறித்துத் தகவல் அறிந்ததும் தீயணைப்புத் துறை, நகராட்சி மற்றும் மாவட்ட நிர்வாகக் குழுவினர் உடனடியாகச் சம்பவ இடத்திற்கு விரைந்து வந்தனர். சிறுமியை மீட்கும் நோக்கில் சாக்கடைகள் மற்றும் மேன்ஹோல் வழியாக தீவிரத் தேடுதல் வேட்டை தொடங்கப்பட்டது. இருப்பினும், தொடர்ந்து பெய்து வரும் மழை மற்றும் அப்பகுதியில் தேங்கியுள்ள வெள்ளநீர் காரணமாக மீட்புப் பணிகளில் கடும் பின்னடைவும் சிரமமும் ஏற்பட்டுள்ளது. எவ்வாறாயினும், சிறுமியைக் கண்டுபிடிக்கும் வரை மீட்பு நடவடிக்கைகள் தொடர்ந்து நடைபெறும் என்று அதிகாரிகள் தெரிவித்துள்ளனர்.

இந்தக் கொடூர விபத்தைத் தொடர்ந்து, நகராட்சி மற்றும் உள்ளாட்சி நிர்வாகத்திற்கு எதிராக அப்பகுதி பொதுமக்கள் கடும் ஆத்திரமடைந்துள்ளனர். மழைக்காலத்திற்கு முன்னதாகச் சாக்கடைகளை முறையாகத் தூர்வாரவில்லை என்றும், திறந்தவெளி சாக்கடைகள் மற்றும் மேன்ஹோல்களை மூடும் பணிகளை அரைகுறையாக விட்டதே இந்த அசம்பாவிதத்திற்குக் காரணம் என்றும் பொதுமக்கள் குற்றம் சாட்டுகின்றனர். சிறுமி மாயமானதால் அவரது குடும்பத்தினர் பெரும் அதிர்ச்சியிலும் சோகத்திலும் மூழ்கியுள்ள நிலையில், அப்பகுதியில் ஏராளமான மக்கள் திரண்டுள்ளனர்.