திருமணமாகி 4 வருஷம் கூட ஆகல…பிரபல கன்னட நடிகையின் வாழ்க்கையிலும் விழுந்த விவாகரத்து இடி…பிரபலங்களின் விவாகரத்து மர்மம்…!

தமிழில் மச்சி, சுட்டபழம், திருடிய இதயத்தை உள்ளிட்ட படங்களில் நடித்து தமிழ் மற்றும் கன்னட ரசிகர்களிடையே பிரபலமானவர் நடிகை சுபா புஞ்சா. கடந்த 2020-ஆம் ஆண்டு தொழிலதிபர் சுமந்த் பில்லவாவைத் தனது காதலர் என அறிமுகப்படுத்திய இவர், இருவீட்டாரின் சம்மதத்துடன் கடந்த 2022-ஆம் ஆண்டு நெருங்கிய உறவினர்கள் மற்றும் நண்பர்கள் முன்னிலையில் கோலாகலமாகத் திருமணம் செய்துகொண்டார். இந்நிலையில், திருமணமாகி நான்கு ஆண்டுகள் கூட நிறைவடையாத சூழலில், தற்போது இந்தத் தம்பதியினர் தங்களின் திருமண உறவை முறித்துக் கொள்ளும் நோக்கில் விவாகரத்து கோரி நீதிமன்றத்தை நாடியுள்ளதாக வெளியாகியுள்ள தகவல்கள் ரசிகர்களைப் பெரும் அதிர்ச்சியில் ஆழ்த்தியுள்ளன.

சமீபகாலமாகத் திரைத்துறையைச் சேர்ந்த முன்னணி பிரபலங்களின் வாழ்க்கையில் விவாகரத்து என்பது தொடர்கதையாகி வருகிறது. காதலித்துத் திருமணம் செய்து கொண்டாலும் சில ஆண்டுகளிலேயே பிரிந்துவிடுவது தற்போதைய ட்ரெண்டாக மாறிவிட்டதோ என்ற அச்சம் எழுந்துள்ளது. தனுஷ், சமந்தா, ஏ.ஆர். ரஹ்மான், ஜெயம் ரவி, ஜி.வி. பிரகாஷ் குமார், விஜய் எனப் பல டாப் நட்சத்திரங்களின் வரிசையில் தற்போது 42 வயதாகும் நடிகை சுபா புஞ்சாவும் இணைந்துள்ளார். கோடிக்கணக்கில் செலவு செய்து ஆடம்பரமாகத் திருமணம் செய்து கொள்ளும் பிரபலங்களின் வாழ்க்கையில்கூட, இந்த விவாகரத்து விவகாரம் பேரிடியாக இறங்கி வருவதாகச் சமூக வலைத்தளங்களில் விவாதங்கள் எழுந்துள்ளன.

கணவர் சுமந்த் பில்லவாவை பிரிவதற்கான உண்மையான காரணம் என்ன என்பதை நடிகை சுபா புஞ்சா இதுவரை அதிகாரப்பூர்வமாக வெளிப்படுத்தவில்லை. தங்களின் தனிப்பட்ட விருப்பத்தின் பேரில், பரஸ்பரம் இருவரும் ஒருமனதாகப் பிரிந்து வாழ முடிவெடுத்திருப்பதாகத் தகவல் வெளியாகியுள்ளது. மேலும், இந்த இக்கட்டான சூழலில் தங்களின் பிரத்தியேக உரிமைக்கு (Privacy) ரசிகர்களும் ஊடகங்களும் மதிப்பளிக்க வேண்டும் என்றும், தங்களைப் பற்றி அவதூறான செய்திகளையோ அல்லது தவறான வதந்திகளையோ பரப்ப வேண்டாம் என்றும் அவர்கள் தரப்பில் கோரிக்கை விடுக்கப்பட்டுள்ளது.